डा. अमरेश कुमार सिंह विजयी, काँग्रेस सभापति गगन थापा पराजित

वीरगञ्ज, २४ फाल्गुन ।  प्रतिनिधिसभा सदस्य निर्वाचनअन्तर्गत सर्लाही क्षेत्र नम्बर ४ मा राष्ट्रिय स्वतन्त्र पार्टी (रास्वपा)का उम्मेदवार डा. अमरेशकुमार सिंहले विजय हासिल गरेका छन् ।

आइतबार सम्पन्न निर्वाचनको अन्तिम मतपरिणाम अनुसार, सिंहले ३५ हजार ६८८ मत प्राप्त गर्दै निकटतम प्रतिस्पर्धी नेपाली काँग्रेसका सभापति गगनकुमार थापालाई पराजित गरेका हुन् । थापाले २२ हजार ८३८ मत प्राप्त गरेका छन् ।

मतगणनाको प्रारम्भदेखि नै अग्रता कायम राखेका सिंहको विजयले यस क्षेत्रमा राजनीतिक परिदृश्यमा नयाँ मोड ल्याएको छ ।

निर्वाचन अधिकृत विनोदप्रसाद घिमिरेका अनुसार, अन्य उम्मेदवारहरूमा नेकपा (एमाले)का अमनिशकुमार यादवले ९ हजार ३४३ मत, नेपाल कम्युनिस्ट पार्टी (नेकपा)का रजनिश राय यादवले १ हजार ४०१ मत र जनमत पार्टीका राकेश मिश्रले १ हजार ५७२ मत प्राप्त गरेका छन् । एक लाख २१ हजार १२ जना मतदाता रहेको यस क्षेत्रमा कुल ७७ हजार ९३१ मत खसेको थियो ।

पराजित भए पनि नेपाली काँग्रेसका सभापति गगन थापाले सामाजिक सञ्जालमार्फत विजयी उम्मेदवार सिंहलाई बधाई तथा शुभकामना दिएका छन् । थापाले आफूलाई मत दिने मतदाताप्रति कृतज्ञता व्यक्त गर्दै भनेका छन्, “निर्वाचित हुनुभएकोमा डा. अमरेश सिंहलाई हार्दिक बधाई तथा शुभकामना । मलाई माया, विश्वास र मत दिनुहुने यस क्षेत्रका सम्पूर्ण मतदाताप्रति हार्दिक कृतज्ञता व्यक्त गर्दछु । यस क्षेत्रमा मैले देखेका समस्याहरूको सम्बोधन गर्न, मेरो पहल र क्षमताभित्रबाट सम्भव हुने कामहरू निरन्तर रूपमा गरिरहनेछु ।”