पोखरामा ट्रान्सपार्टी प्रकरण, १२ जना पक्राउ

पोखरा, १७ चैत। पोखरामा विदेशीसँग मिलेर ट्रान्सपार्टी आयोजना गरेको आरोपमा १२ जना पक्राउ परेका छन् ।

अवैध रूपमा ट्रान्सपार्टी भइरहेको सूचना पाएपछि कास्की प्रहरीले छापा मारेको हो । पोखरा १८ मा बमेन्द्र पुनले भाडामा लिएको घरमा पार्टी सञ्चालन गरिएको हो । स्थानीय कृष्ण पराजुलीको पुरानो घर भाडामा लिई बमेन्द्र लगायतको समूहले ट्रान्स पार्टी आयोजना गरेको प्रहरीको अनुसन्धानबाट खुलेको छ ।

लागुऔषधको खुला बिक्री वितरण तथा सेवन भइरहेको विशेष सूचना प्राप्त भएपछि प्रहरीले मध्यरातमा छापा मारेको कास्की प्रहरीका प्रवक्ता डीएसपी हरीबहादुर बस्नेतले जानकारी दिए । घटनास्थलबाट ९ प्रकारका लागुऔषध बरामद भएको छ भने विदेशीसहित १२ जना पक्राउ परेका छन् ।

पक्राउ परेकामध्ये ८ जनालाई लागुऔषध र ४ जनालाई अभद्र व्यवहारको मुद्दा चलाइएको उनले बताए ।