रास्वपालाई जम्बो मन्त्रिमण्डल घटाउन सकस, मन्त्री बन्न नेताहरूको दौडधुप

अन्तरिम सरकारले भने दुई वा बढी मन्त्रालयलको जिम्मा समेत एउटै मन्त्रीलाई दिएर मन्त्रिमण्डलको संख्या १५ भन्दा बढ्न दिएको थिएन । तर यसपटक रास्वपाले १८ वटाभन्दा धेरै मन्त्रालय नराख्नेगरी आफ्नो बाचापत्रमा एजेण्डा बनाएको छ । यस व्यवस्थालाई कार्यान्वयन गर्ने हो भने अब बन्ने सरकारले अहिले रहेको २२ वटा मन्त्रालयमा ४ वटा मन्त्रालयको कार्यक्षेत्र अन्य मन्त्रालयमा गाभ्नु पर्ने देखिन्छ ।

तर अहिलेसम्म रास्वपाभित्र कुन मन्त्रालय कहाँ गाभ्ने र कसरी व्यवस्थापन गर्ने भन्ने सम्बन्धमा भने कुनै पनि औपचारिक छलफल हुन नसकेको ती नेताले दाबी गरे । बाचापत्र (घोषणापत्र) लेखन गर्दा समितिले विभिन्न विकल्पबारे छलफल भएको हुनसक्ने भए पनि अहिलेसम्म पार्टीमा औपचारिक रुपमा यसबारे छलफल नभएको रास्वपाका नेता गणेश पराजुली बताए ।

बालेन सचिवालयका एक सदस्य भने १८ वटा मन्त्रालय तत्काल कार्यान्वयन गर्न सहज नभएको उनले बताए । अहिलेसम्म २२ वटा मन्त्रालय संख्याको हिसाबले धेरै देखिए पनि कार्यक्षेत्रका आधारमा भने अहिले नै भारी जस्तो देखिन थालिएको छ । कति मन्त्रालय राख्ने विषयभन्दा पनि रास्वपाका सभापति रवि लामिछाने र भावी प्रधानमन्त्रीसमेत रहेका पार्टीका वरिष्ठ नेता बालेनबीचमा कसलाई कुन मन्त्रालयको जिम्मेवारी दिने भन्दै गोप्यरुपमा भलाकुसार ीसमेत भएको जनाइएको छ ।

यसले गर्दा मन्त्रालयको संख्याभन्दा पनि पार्टी भित्र बाट मन्त्री बन्नका लागि आउन थालेको दबाब थेग्न पनि शीर्षनेताहरुलाई हम्मेहम्मे परेको एक नेताले दाबी गरे । प्रष्ट कार्यक्षेत्र भएका प्रधानमन्त्री कार्यालय, अर्थ मन्त्रालय, गृह मन्त्रालय, परराष्ट्र मन्त्रालय, रक्षा मन्त्रालय, सञ्चार तथा सूचना प्रविधि मन्त्रालयलगायत अन्य मन्त्रालयका कार्यक्षेत्र आफैँमा पनि अन्योलता देखिएको छ ।

केही मन्त्रालयबीच कार्यक्षेत्रको दोहोरोपनको समस्या छ भने केहीका अत्यन्तै भेग प्रकृतिको कार्यक्षेत्र रहेको उनीहरुबीच भएको छलफलको निचोड रहेको उनको भनाइ छ । पार्टी सभापति लामिछाने र वरिष्ठ नेता साहसहितको टीम मन्त्री बनाउने र मन्त्रालय थपघटको विषयमा केन्द्रित भइरहँदा बाहिर भने निर्वाचित सांसदहरु मन्त्री बन्नका लागि सामाजिक सञ्जालदेखि आन्तरिक पहुँच अनुसारसम्म लविंग थालेका छन् ।

पार्टी प्रवक्तासमेत रहेका नवनिर्वाचित प्रतिनिधिसभा सदस्य मनिष झा पनि मन्त्री बन्ने लाइनमा छन् । तर उनी भने व्यक्तिगत रुपमा गुपचुप रहे पनि उनका कार्यकर्ता तथा समर्थकहरु भने सामाजिक सञ्जाल अन्तर्गतको फेसबुकमा सक्रियताका साथ सञ्चार मन्त्रालय वा शिक्षा मन्त्रालयमा दाबी गर्न थालेका छन् ।

केही दिन अघि पार्टी प्रवक्ता झाले आफू मन्त्री बन्ने लाइनमा नलाग्ने तर अवसर दिएमा आफू जुनसुकै मन्त्रालयको जिम्मेवारी सम्हाल्न सक्षम रहेको बताएका थिए । तर निर्वाचन हुनु अघि झाले आफूलाई सञ्चार तथा प्रविधि मन्त्रालयको जिम्मेवारी सम्हाल्न तयार रहनका लागि पार्टीभित्रैबाट निर्देशन आएको सार्वजनिक रुपमै अभिव्यक्ति नै दिएका थिए ।

यता रास्वपा सचिवालयको बैठक आइतबार बस्ने भएको छ । शनिबार बस्ने भनिएको बैठक आइतबारका लागि तय भएको जनाइएको छ । बैठक आइतबार बिहान १० बजे पार्टी कार्यालय वनस्थलीमा बस्ने रास्वपा निकट स्रोतले जनाएको छ । प्रतिनिधिसभा सदस्य निर्वाचन २०८२ को समानुपातिक उम्मेदवार सिफारिस लगायत विषयलाई बैठकको कार्यसूचीमा राखिएको छ ।

यसका साथै वरिष्ठ नेता साहलाई संसदीय दलको नेता बनाउन आवश्यक कदमबारे पनि बैठकमा छलफल हुने बताइएको छ ।