पर्साका नवनिर्वाचित सांसदहरू वीरगञ्ज उद्योग वाणिज्य सङ्घद्वारा सम्मानित

वीरगञ्ज, १० चैत। वीरगञ्ज उद्योग वाणिज्य सङ्घले पर्सा जिल्लाबाट निर्वाचित राष्ट्रिय स्वतन्त्र पार्टी (रास्वपा) का चार जना प्रतिनिधिसभा सदस्यहरूलाई विशेष समारोहबिच स्वागत तथा सम्मान गरेको छ ।

सङ्घले पर्सा क्षेत्र नम्बर १ का सांसद हरि पन्त, क्षेत्र नम्बर २ का सांसद सुशील कुमार कानु, क्षेत्र नम्बर ३ का सांसद रामाकान्त चौरसिया र क्षेत्र नम्बर ४ का सांसद टेकबहादुर शाक्य लाई औपचारिक कार्यक्रममार्फत सम्मान गरेको हो ।

कार्यक्रममा सांसदहरूले सङ्घले विगत लामो समयदेखि उठाउँदै आएका उद्योगी तथा व्यवसायीका साझा समस्याहरूप्रति पूर्ण एकमत रहेको बताएका छन् । उनीहरूले समग्र आर्थिक विकास, उद्योग व्यवसाय प्रवर्द्धन र निजी क्षेत्रको समस्या समाधानका लागि सामूहिक रूपमा पहल गर्ने प्रतिबद्धता व्यक्त गरे ।

कार्यक्रमलाई सम्बोधन गर्दै पर्सा क्षेत्र नम्बर १ का सांसद हरि पन्तले सङ्घले वर्षौँदेखि उठाएका साझा समस्या समाधान गर्न आफूले हर सम्भव प्रयास गर्ने बताए । उनले औद्योगिक कोरिडोर निर्माण र उधारो कानुन जस्ता महत्त्वपूर्ण मागहरूप्रति आफू पूर्ण प्रतिबद्ध रहेको उल्लेख गरे ।

“म स्वयम् उद्योग वाणिज्य सङ्घको सदस्यका रूपमा काम गर्दा उद्योगी–व्यवसायीले भोगिरहेका समस्याहरू राम्रोसँग बुझेको छु । तपाईँहरूको समस्या मेरो पनि समस्या हो । यसको समाधान गर्न म पूर्ण रूपमा प्रतिबद्ध छु,” पन्तले भने ।

उनले बालेन्द्र साह (बालेन) को नेतृत्वमा बन्ने सरकारले भ्रष्टाचार, कुशासन र बेथितिलाई जसरी पनि अन्त्य गर्ने दाबी गरे । “जनताले हामीलाई देशमा जरा गाडेर बसेको भ्रष्टाचार, कुशासन र बेथितिको अन्त्य गर्न पठाएको हो । यदि यो अन्त्य भएन भने म आफ्नै सरकारको प्रतिपक्ष बन्न पनि पछि पर्दिनँ,” उनले आश्वासन दिए ।

त्यस्तै पर्सा क्षेत्र नम्बर २ का सांसद सुशील कुमार कानुले घरेलु, मालपोत, नापी, नारायणी अस्पताललगायत विभिन्न सरकारी कार्यालयहरूमा व्याप्त बिचौलिया प्रवृत्ति, सिफारिस र मुचुल्काको नाममा हुने अनियमितता तत्काल रोकिने बताए ।

निर्वाचन पूर्व नै आफूले अब बिचौलिया र दलालहरूको दोकानदारी बन्द हुने सुनाउँदै भने, “आज प्रत्येक सरकारी कार्यालयमा दलाली छ । बिचौलियाहरूले सरकारी कार्यालय घेरेर राखेका छन् । सरकार गठन भएपछि सर्वप्रथम बिचौलिया र दलालहरूको दोकान बन्द गरिनेछ ।”

उनले उद्योग वाणिज्य सङ्घका पदाधिकारी तथा सदस्यहरूबाट प्राप्त सुझावअनुसार नै काम गर्ने र भविष्यमा पनि निरन्तर संवाद कायम राख्ने बताए । वीरगञ्जको विकास र यहाँका जनताको जीवनस्तर उकास्ने नीतिहरू ल्याउन चारै सांसदहरूले संयुक्त रूपमा आवाज उठाउने पनि उनको भनाइ थियो ।

पर्सा क्षेत्र नम्बर ३ का सांसद रामाकान्त चौरसियाले आफू पनि निजी क्षेत्रबाट प्रतिनिधित्व गर्दै सदनमा प्रवेश गरेको बताउँदै उद्योगी–व्यवसायीले भोगिरहेको पीडा आफूले राम्रोसँग बुझेको उल्लेख गरे । उनले सदनमा निजी क्षेत्रको प्रतिनिधिका रूपमा निरन्तर आवाज उठाउने प्रतिबद्धता जनाए ।

पर्सा क्षेत्र नम्बर ४ का सांसद टेकबहादुर शाक्यले उद्योगी–व्यवसायीका समस्याहरू समाधान गर्न साझा पहल आवश्यक रहेको बताए । उनले पर्साको समग्र विकासका लागि वीरगञ्जसँगै ठोरीलगायतका क्षेत्रको विकासमा जोड दिए ।

शाक्यले आगामी केही दिनभित्रै ठोरीमा लगानी सम्मेलन आयोजना गर्न लागेको जानकारी दिँदै यसले पर्यटन विकास, नयाँ उद्योग स्थापना र रोजगारी सिर्जनामा महत्त्वपूर्ण भूमिका खेल्ने विश्वास व्यक्त गरे ।

कार्यक्रम वीरगञ्ज उद्योग वाणिज्य सङ्घका अध्यक्ष हरि गौतम को सभापतित्वमा सम्पन्न भएको थियो । कार्यक्रममा नेपाल उद्योग वाणिज्य महासङ्घका सदस्य सुबोध कुमार गुप्ता, मधेस प्रदेशका अध्यक्ष अशोक कुमार टेमानी, सङ्घका पूर्व अध्यक्ष अशोक वैद्य, विभिन्न पदाधिकारी, सल्लाहकार तथा सञ्चारकर्मीहरूको उपस्थिति थियो ।

कार्यक्रमको सहजीकरण सङ्घका महासचिव शिवजी साहले गरेका थिए ।