मधेसकेन्द्रित दलहरू चुनावमा सखाप, एकताबाट नयाँ समीकरणको खोजी

वीरगञ्ज, २९ चैत। जेनजी आन्दोलनपछि फागुन २१ गते सम्पन्न प्रतिनिधि सभाको निर्वाचनमा तराई–मधेस केन्द्रित राजनीतिक दलहरू कमजोर प्रदर्शन गर्दै लगभग सखाप भएका छन्। मधेसवादी दलहरूमध्ये कुनै पनि दलले एक सिटसमेत जित्न नसक्दा २०८२ को अन्त्यतिर आएको यो परिणाम उनीहरूका लागि निराशाजनक बनेको छ।

राजनीतिक विश्लेषकहरूका अनुसार २०८२ को सुरुवातसँगै मधेसकेन्द्रित दलहरूको ओरालो यात्रा सुरु भएको थियो, जसको प्रत्यक्ष प्रभाव निर्वाचन परिणाममा देखिएको हो।

मधेस राजनीतिमा सक्रिय प्रमुख दलहरूमा जनता समाजवादी पार्टी (उपेन्द्र यादव नेतृत्व), लोकतान्त्रिक समाजवादी पार्टी (महन्थ ठाकुर नेतृत्व), राष्ट्रिय मुक्ति पार्टी नेपाल (राजेन्द्र महतो नेतृत्व), जनमत पार्टी (डा. सीके राउत नेतृत्व), नेपाल सद्भावना पार्टी (अनिल झा नेतृत्व), तराई मधेस लोकतान्त्रिक पार्टी (वृषेशचन्द्र लाल नेतृत्व), नागरिक उन्मुक्ति पार्टी (रेशम चौधरी संरक्षक), जनता प्रगतिशील पार्टी (हृदयेश त्रिपाठी नेतृत्व) तथा नेपाल सङ्घीय समाजवादी पार्टी (मोहम्मद रिजवान अन्सारी नेतृत्व) लगायत रहेका थिए।

हाल भने जसपा नेपाल, लोसपा नेपाल र जनता प्रगतिशील पार्टी बीच एकता भइसकेको छ। उक्त एकतामा तमलोपा पनि प्रारम्भमा सहभागी भए पनि निर्वाचनकै समयमा आफू एकीकृत पार्टीमा नरहेको घोषणा गर्दै अलग भएको थियो।

निर्वाचनमा आएको कमजोर नतिजापछि मधेसकेन्द्रित दलहरू अब एकता, पुनर्गठन र नयाँ रणनीतिमार्फत आफ्नो राजनीतिक आधार पुनः स्थापित गर्ने प्रयासमा लागेका छन्। विश्लेषकहरूका अनुसार आगामी दिनमा मधेस राजनीतिमा नयाँ समीकरण र शक्ति सन्तुलनको सम्भावना देखिएको छ।