वीरगञ्ज प्रिमियर लिग सकियो, इन्फर्नो रेडर्स बने विजेता

काठमाडौं, २९ चैत। वीरगञ्जमा आयोजित वीरगञ्ज प्रिमियर लिग (BPL) सिजन–३ भव्य रूपमा सम्पन्न भएको छ। २०८२ चैत १७ गते (मार्च ३१) देखि सुरु भएको डे–नाइट सफ्टबल क्रिकेट प्रतियोगिता २०८२ चैत २८ गते (अप्रिल ११) मा समापन गरिएको हो।

प्रतियोगिताको टाइटल स्पोन्सर Body Vibe रहेको थियो भने कार्यक्रमको आयोजना Team Adarshnagar ले गरेको हो।

समापन समारोहका प्रमुख अतिथि हरि पन्त रहेका थिए। उनले प्रतियोगिताको सफल आयोजनाको प्रशंसा गर्दै खेलकुदले युवाहरूमा अनुशासन, एकता र नेतृत्व विकासमा महत्वपूर्ण भूमिका खेल्ने बताए। कार्यक्रममा अमन आलम र गौतम श्रेष्ठ विशिष्ट अतिथिका रूपमा सहभागी थिए।

प्रतियोगिताको फाइनल खेल सराफ एण्ड सन्स र वीरगञ्ज इन्फर्नो रेडर्सबीच सम्पन्न भएको थियो। कडा प्रतिस्पर्धापछि वीरगञ्ज इन्फर्नो रेडर्सले उत्कृष्ट प्रदर्शन गर्दै यस सिजनको उपाधि जित्न सफल भएको हो।

प्रतियोगिताभर विभिन्न टोलीहरूले उत्कृष्ट प्रदर्शन गरेका थिए भने दर्शकहरूको उल्लेखनीय उपस्थिति रहेको थियो। आयोजकले प्रतियोगितालाई सफल बनाउन सहयोग गर्ने सम्पूर्ण प्रायोजक, खेलाडी तथा दर्शकहरूलाई धन्यवाद व्यक्त गरेको छ।