इन्धनमा ‘अनावश्यक कर’ हटाउन प्रभु साहको सरकारसँग आग्रह

रौतहट, ०८ वैशाख। आम जनता पार्टी (आजपा) का अध्यक्ष एवं पूर्वमन्त्री प्रभु साहले पेट्रोलियम पदार्थमा सरकारले लगाउँदै आएको अनावश्यक करहरू हटाउन माग गरेका छन् । सरकारले लगाउँदै आएको अनावश्यक कर हटाए उपभोक्ताले सहज र कममूल्यमै पेट्रोलियम पदार्थ पाउन सक्ने उनको भनाइ छ ।

काठमाडौँको कोटेश्वरस्थित आजपा केन्द्रीय कार्यालयमा आज सञ्चारकर्मीसँग कुरा गर्दै आजपा अध्यक्ष साहले प्रतिलिटर पेट्रोल १४९ रुपैयाँमा किनेर २१९ रुपैयाँमा बेच्नुले सर्वसाधारण महँगीको मारमा परेको बताए ।

‘अन्तर्राष्ट्रिय बजार बमोजिम आइओसीबाट प्राप्त औसत कुरमुक्त मूल्य १४९ रुपैयाँ १७ पैसामा एक लिटर पेट्रोल किनेर सरकारले उपभोक्तालाई २१९ रुपैयाँमा बेचिरहेको छ । यसमा विभिन्न नाममा कर, सेवा शुल्क लगायतका समावेश गरेर २१९ रुपैयाँमा किन बेच्नुपर्‍यो । यो अनावश्यक कर सरकारले हटायो भने उपभोक्ताले सजिलै र सहज रूपमा सस्तोमै पेट्रोल पाउन सक्छ,’ आजपा अध्यक्ष साहले भने ।