नेपालमा सडक दुर्घटना बढ्दो, ५० प्रतिशत मृत्यु मोटरसाइकलमा संलग्न

काठमाडौं, १९ वैशाख। नेपालमा सडक दुर्घटनाको अवस्था भयावह बन्दै गएको तथ्य सार्वजनिक भएको छ । भौतिक पूर्वाधार तथा यातायात मन्त्रालयले हालै सार्वजनिक गरेको ‘यातायात सुधार सुझाव कार्यदल, २०८०’ को प्रतिवेदनले नेपालमा बर्सेनि करिब ३ हजार नागरिकले सडक दुर्घटनामा ज्यान गुमाउने गरेको डरलाग्दो तथ्यांक प्रस्तुत गरेको छ ।

पूर्वसचिव शरदचन्द्र पौडेलको संयोजकत्वमा गठित विज्ञ कार्यदलको प्रतिवेदन अनुसार सडक दुर्घटनामा ज्यान गुमाउनेमध्ये ५० प्रतिशतभन्दा बढी मोटरसाइकल लगायत दुईपाङ्ग्रे सवारीका चालक र सवार रहेका छन् । दुर्घटनाको यो बढ्दो दरलाई न्यूनीकरण गर्न कार्यदलले नीतिगत र व्यवहारिक सुधारका कडा कदमहरू चाल्न सरकारलाई सुझाव दिएको छ ।

साथै सडक निर्माणकै चरणमा हुने प्राविधिक त्रुटिका कारण धेरै दुर्घटना हुने गरेको औँल्याउँदै प्रतिवेदनले अबदेखि सडक निर्माण गर्दा अनिवार्य ‘सडक सुरक्षा परीक्षण’ (रोड सेफ्टी अडिट) लागू गर्नुपर्ने प्रस्ताव गरेको छ । यस्तै, लामो दूरीका सवारी साधनहरूमा हुने दुर्घटना रोक्न चालकको ड्युटी समय र आरामको विषयलाई कडा रूपमा नियमन गर्नुपर्नेमा कार्यदलले जोड दिएको छ ।