वीरगञ्ज घण्टाघर चोकबाट मोटरसाइकल चोरी, सिसिटिभी निष्क्रिय

वीरगञ्ज, १८ वैशाख। वीरगञ्जको व्यस्त घण्टाघर चोकबाट एक युवा उद्यमीको मोटरसाइकल चोरी भएको छ ।

बिहीबार साँझ स्थानीय युवा उद्यमी तुषार अग्रवालको यामाहा कम्पनीको निलो रङको एफजेड मोटरसाइकल घण्टाघर चोकस्थित नेपाल टेलिकम अगाडिको पार्किङ स्थानबाट चोरी भएको हो ।

अग्रवालका कर्मचारीले केही सामग्री किन्नका लागि मोटरसाइकल त्यहाँ पार्क गरेर गएका थिए । फर्किएर आएपछि मोटरसाइकल हराएको देखेपछि उनीहरूले तुरुन्तै खोजतलास गरेका थिए । घटनाबारे प्रहरीलाई जानकारी गराइएको अग्रवालले बताएका छन् । मोटरसाइकलको नम्बर प्रदेश २-०३-००६-प-५८३८ रहेको छ ।

प्रहरीलाई मोटरसाइकल खोजीमा कठिनाइ भएको बुझिएको छ । वीरगञ्जको मुख्य सडक विस्तारका क्रममा क्षति पुग्दा मुख्य सडकमा जडान गरिएका अधिकांश सिसिटिभी क्यामेराहरू काम नगर्दा प्रहरीलाई मोटरसाइकल खोज्न कठिनाइ भइरहेको पाइएको छ । क्यामेराहरू काम नगर्दा चोरीका घटनाको अनुसन्धान गर्न प्रहरीलाई चुनौती थपिएको छ ।

पछिल्लो समय वीरगञ्जमा मोटरसाइकल चोरीका घटनाहरूमा उल्लेखनीय वृद्धि भएको स्थानीयहरू बताउँछन् । व्यस्त चोक, बजार क्षेत्र र पार्किङ स्थलहरूबाट बारम्बार मोटरसाइकल हराउने गरेका छन् ।