‘फेक रेस्क्यु’ प्रकरणमा ३३ प्रतिवादी, अनुसन्धान प्रतिवेदन बुझाइयो

‘फेक रेस्क्यु’बारे २०८१ माघ ११ मा जाहेरी दर्ता गरेर प्रहरीले अनुसन्धान अघि बढाएको थियो । करिब डेढ महिना अनुसन्धान गरेर प्रहरीले अनुसन्धान प्रतिवेदन बुझाएको हो ।

आरोपितहरूसँग ९४ करोड ८४ लाख नेपाली रुपैयाँ, २९ लाख ९८ हजार अमेरिकी डलर र १४ हजार युरो बिगो मागदाबी लिनुपर्ने प्रहरीको राय छ । ‘फेक रेस्क्यु’मा १६ वटा ट्रेकिङ्ग कम्पनी, ५ वटा रेस्क्यु कम्पनी, ३ वटा अस्पताल, ४ वटा हेलिकप्टर कम्पनी र अन्तर्राष्ट्रिय बीमा कम्पनीका ३ जना लोकल एजेन्ट संलग्न देखिएका छन् । एक जना गाइड पनि सो प्रकरणमा संलग्न देखिएको अनुसन्धानमा संलग्न प्रहरी अधिकृत बताउँछन् ।

‘फेक रेस्क्यु’मा संलग्न आरोपितहरू धेरै कम्पनीमा आवद्ध पाइएको जानकारी दिँदै सीआईबीका प्रमुख (एआईजी) केसीले ३३ जनालाई प्रतिवादी कायम गरेर अनुसन्धान प्रतिवेदन बुझाइएको बताए ।

• बिरामीलाई सपिङ गर्न पठाउने अस्पताल

लाजिम्पाटस्थित श्रीद्धी इन्टरनेशनल अस्पताल र धोबीखोला करिडोरमा सञ्चालित स्वाकन अस्पताल सहित ३ वटा अस्पतालका सञ्चालक ‘फेक रेस्क्यु’मा संलग्न देखिएका छन् । श्रीद्धी इन्टरनेशनल अस्पतालका सञ्चालक डा. गिर्वाणराज तिमिल्सिना पक्राउ परेका छन् भने स्वाकन अस्पताल सञ्चालिका डा. मिनालमा पाण्डेविरुद्ध अदालतबाट पक्राउ पुर्जी जारी भएको छ । उनी फरार छिन् ।

पर्वतारोहण र ट्रेकिङ्ग क्षेत्रबाट पर्यटकलाई रेस्क्यु गरेपछि स्वाकन अस्पतालका सञ्चालकले जबरजस्ती अस्पताल भर्ना गरेर दिउँसो सपिङ गर्न पठाएको समेत भेटिएको छ । एभरेष्ट रिजनबाट हेलिकप्टरमार्फत रेस्क्यु गरिएका एक जना पर्यटकलाई दिउँसो सपिङ गर्न पठाएर साँझमात्र अस्पतालमा राखेको भेटिएको अनुसन्धानमा संलग्न एक जना प्रहरी अधिकृतले रातोपाटीलाई बताए ।

प्रहरी स्रोतका अनुसार तोकिएको अस्पतालमा भर्ना नभए जरिबाना लाग्ने डर देखाएर मिलेमतोमा ती पर्यकटलाई स्वाकनमा भर्ना गरेर पासपोर्ट जफत गरेको भेटिएको छ । ‘फेक रेस्क्यु’ गरेर बिरामीलाई भर्ना गरेपछि अस्पतालका सञ्चालकले ट्रेकिङ एजेन्सी र शेर्पासँग पनि सम्पर्क गरेर अवस्थाबारे जानकारी गराउने गरेका थिए । एक जना विदेशी नागरिकले स्वाकन अस्पतालले आफूलाई जबरजस्ती भर्ना गरेको भनेर इमेल मार्फत सीआईबीमा उजुरी गरेका छन् ।

बीमा कम्पनीबाट भुक्तानीको ग्यारेन्टी नआएसम्म अस्पताल सञ्चालकले पासपोर्ट फिर्ता नगर्ने गरेको भेटिएको छ । स्वाकन अस्पताल सञ्चालकले पर्यटकलाई ‘उद्धारका लागि बाध्य पारिएको थिएन’ र ‘अस्पतालको सेवामा सन्तुष्ट रहेको’ भन्ने कागजमा पनि हस्ताक्षर गराएको भेटिएको छ ।

‘फेक रेस्क्यु’ प्रकरणमा संलग्न अस्पतालहरूले प्रोटोकलभन्दा बढी बीमा दाबीका लागिमात्र बिरामी भर्ना गर्ने गरेका थिए । भर्ना गरिएका पर्यटकहरू होटलमा गएर बस्ने र घुम्नसमेत जाने गरेका थिए । अनुसन्धानमा संलग्न सीआईबीका एक जना अधिकृतले भने, ‘पर्यटकलाई पछि बोलाएर डिस्चार्ज पेपर दिने गरेको खुलासा भएको छ ।’

अस्पतालहरूले नक्कली स्वास्थ्य रिपोर्ट बनाएर बीमा दावी गर्ने गरेका थिए । बढी बिल तयार गरेर उनीहरूले स्वास्थ्य बीमा दाबी गर्दै रेस्क्यु कम्पनी र ट्रेकिङ्ग कम्पनीका सञ्चालकसँग रकम बाँडफाँट गर्ने गरेको अनुसन्धानबाट थाहा भएको छ ।

• रेस्क्यु र ट्रेकिङ कम्पनीको भूमिका के ?

‘फेक रेस्क्यु’मा १६ वटा ट्रेकिङ्ग कम्पनी र ५ वटा रेस्क्यु कम्पनीको संलग्नता देखिएको छ । ट्रेकिङ्ग कम्पनीले पर्यकटलाई बीमा गर्न अनुकूल कम्पनी छनोट गरेर पर्यकटकको आइटिनरी तयार गर्ने गरेका थिए । ट्रेकिङ्ग कम्पनीले गाईडको व्यवस्थापन र रेस्क्यु कम्पनीसँग समन्वय गर्ने गरेको भेटिएको छ । ट्रेकिङ्ग कम्पनीहरूले रेस्क्यु कम्पनी र अस्पतालबाट अवैध कमिसन लिने गरेको भेटिएको अनुसन्धानमा संलग्न अधिकृत बताउँछन् ।

रेस्क्यु कम्पनीहरूले ट्रेकिङ कम्पनीहरूसँग रेस्क्यु गर्नुपर्ने पर्यटकको इन्स्युरेन्स पोलिसी पेपर लिने र हेलिलिफ्ट गरेर सम्बन्धित अस्पतालमा लैजाने भूमिका खेलेको भेटिएको छ । रेस्क्यु कम्पनीहरूले बीमा कम्पनीहरूसँग भुक्तानीको ग्यारेन्टी लिएर बीमा दाबी गर्ने गरेका थिए ।

टुरिष्ट गाइडले उच्च हिमाली क्षेत्रमा हेरफेर गरिएको आकस्मिकता तयार गरेर हेलिकप्टर बोलाउन बाध्य पार्ने गरेको प्रहरीको अनुसन्धान निष्कर्ष छ । गाइडले हेलिकप्टर बोलाउनुपर्ने भन्दै पर्यटकलाई कन्भिन्स पनि गर्ने गरेका थिए ।

हेलिकप्टर कम्पनीले पर्यटकलाई उद्धार गरेपछि प्यासेन्जर म्यानिफेस्ट किर्ते गरेर रेस्क्यु कम्पनीलाई पठाउने भूमिका खेलेको अनुसन्धानबाट थाहा भएको छ । रेस्क्यु कम्पनीसँग मिलेमतो गरेर आफ्नो नियमित फ्लाइटको व्यापार बढाउने उद्देश्यले हेलिकप्टर कम्पनीहरू फेक रेस्क्युमा संलग्न भएको अनुसन्धानमा संलग्न एक जना अधिकृतले बताए ।