बृन्दावन नगरबासिका लागी निशुल्क एम्बुलेन्स सेवा सुरु, नगरप्रमुख कुर्मीको चुनावी प्रतिबद्धता पूरा हुंदै

रमेश कुमार यादब
पुस १६, रौतहट
रौतहट जिल्लाको बृन्दावन नगरपालिकाले आफ्नो क्षेत्रका नागरिकहरूको स्वास्थ्य सेवामा पहुँच सुनिश्चित गर्नका लागि एउटा उदाहरणीय कदम चालेको छ । नगरपालिकाले एम्बुलेन्स सेवा निशुल्क गरेको घोषणा गर्दै नगरवासीलाई ठूलो राहत प्रदान गरेको छ ।नगर प्रमुख विनोद प्रसाद कुर्मीले आफ्नो चुनावी प्रतिबद्धताहरू पूरा गर्ने क्रममा यो निर्णय गरेका हुन् । नगर प्रमुख बिनोद प्रसाद कुर्मीले आफ्नो चुनावी प्रतिबद्धता अनुरूप स्वास्थ्य क्षेत्रलाई विशेष प्राथमिकता दिँदै यो सेवा लागू गरेका हुन् । नगरप्रमुख कुर्मीले चुनाव जित्नु अघि नगरवासीसँग शिक्षा, स्वास्थ्य र खानेपानी क्षेत्रमा विशेष प्राथमिकता दिने बाचा गरेका थिए ।

तिनै प्रतिबद्धताहरूलाई चरणबद्ध रूपमा कार्यान्वयन गर्दै, गर्भवती महिलाहरूलाई सुत्केरी गराउन र आकस्मिक स्वास्थ्य सेवा आवश्यक पर्ने अवस्थामा अब एम्बुलेन्सको व्यवस्था निशुल्क गरिएको छ ।बृन्दावन नगरपालिकाको वार्ड नं. ७ मा आयोजित साना किसान कृषि सहकारी संस्था लि.को १९ औं बार्षिक साधारण सभा कार्यक्रममा नगरप्रमुख कुर्मीले भने, “नगरवासीको स्वास्थ्य सुरक्षित भयो भने मात्र नगर समृद्ध हुनसक्छ । स्वास्थ्यमा विशेष ध्यान दिनु हाम्रो पहिलो प्राथमिकता हो ।

“ उनले थपे कि गर्भवती महिलाहरूलाई विशेष सुविधा दिने उद्देश्यले यो निर्णय लिइएको हो । यस कदमले विशेष गरी ग्रामीण क्षेत्रका महिलालाई सहज हुने विश्वास गरिएको छ । नगर प्रमुख कुर्मीले भने, “हाम्रो उद्देश्य नगरबासिलाई सहज स्वास्थ्य सेवा दिनु हो । यसले मातृ मृत्यु दर घटाउन र नवजात शिशुको स्वास्थ्य सुधारमा योगदान पु¥याउनेछ ।”नगरप्रमुख कुर्मीका अनुसार, बृन्दावन नगरपालिकाका गर्भवती महिलाहरूलाई सुत्केरी गराउन बिरगंज, गौर, वा अन्य ठूला स्वास्थ्य संस्थामा जानुपर्ने बाध्यता थियो ।

यस क्रममा ४ देखि ५ हजार रुपैयाँसम्मको खर्च हुने गथ्र्यो । तर, अब नगरपालिकाले यो सेवा पूर्ण रूपमा निःशुल्क प्रदान गर्नेछ । गर्भवती महिलादेखि स्वास्थ्य समस्या भएका अन्य नगरबासिलाई सहजरूपमा स्वास्थ्य सेवा उपलब्ध गराउन निशुल्क एम्बुलेन्स सेवा सुरु गरिएको छ । ”गाउँमै रहेको स्वास्थ्य संस्थामा सुत्केरी गराउन चाहने महिलाहरूलाई पनि एम्बुलेन्स सेवा उपलब्ध गराइनेछ ।

यो कदमले नगरवासीलाई आर्थिक र भौतिक रूपमा सजिलो बनाउने विश्वास गरिएको छ ।निशुल्क एम्बुलेन्स सेवाबाहेक, नगरप्रमुख कुर्मीले नगरवासीका लागि अन्य विकासका काम पनि अघि बढाइरहेका छन् । शिक्षा, खानेपानी, र पूर्वाधार विकासमा पनि नगरपालिकाले ठोस कदम चालेको छ ।

नगरबासिहरूले नगरपालिकाको यो कदमको स्वागत गर्दै धन्यवाद दिएका छन् ।। विशेष गरी आर्थिक रूपमा कमजोर वर्गका व्यक्तिहरूलाई यो सेवा अत्यन्तै उपयोगी भएको बताइरहेका छन् । “हामीले यस्तो सेवा पाउने आशा गरेको थिएनौं । यो हाम्रो नगर प्रमुखको उत्कृष्ट निर्णय हो,“ एक स्थानियले भने । यो सेवाले विशेष गरी आर्थिक रूपमा कमजोर वर्गलाई ठूलो राहत दिनेछ ।

नगरप्रमुख कुर्मीले आगामी दिनमा नगरपालिकाभित्र स्वास्थ्य सेवा थप प्रभावकारी बनाउने र अन्य सामाजिक सेवाहरूमा पनि सुधार ल्याउने योजना रहेको बताए । “हाम्रो उद्देश्य नगरलाई समृद्ध बनाउनु हो । यसको लागि शिक्षा, स्वास्थ्य र रोजगारी सिर्जना हाम्रो प्राथमिकता हो,“ उनले भने । बृन्दावन नगरपालिकाको यो निर्णयले नगरवासीको जीवनस्तर सुधार्ने मात्र होइन, सुदूर क्षेत्रमा स्वास्थ्य पहुँचलाई सुनिश्चित गर्दै समग्र स्वास्थ्य प्रणालीलाई बलियो बनाउने विश्वास गरिएको छ ।