सुनसरीमा बाछी जन्मिँदै थुनबाट दूध झर्ने दुर्लभ

सुनसरी,०८ जेठ। सुनसरीको बराहक्षेत्र नगरपालिका–११, मधुवनमा जन्मिएको एक अनौठो बाछी हाल स्थानीयस्तरदेखि सामाजिक सञ्जालसम्म चर्चाको केन्द्रबिन्दु बनेको छ। जन्मिँदै थुनबाट दूध झर्ने दुर्लभ विशेषतासहित देखिएको उक्त बाछीलाई हेर्न अहिले भीड लागेको छ।

सात दिनअघि जन्मिएको सो बाछीको थुन अस्वभाविक रूपमा ठूलो रहेको र त्यसबाट नियमित रूपमा दूध चुहिने गरेको पशुपालक परिवारले जनाएका छन्। सामान्यतया यस्ता लक्षण परिपक्व गाईमा मात्र देखिने भएपनि नवजात बाछीमै यस्तो देखिनुले स्थानीयहरू आश्चर्यमा परेका छन्।

बाछीको अद्वितीय विशेषता सुनेर टाढाटाढाबाट मानिसहरू हेर्न, पूजा गर्न र सामाजिक सञ्जालमा भिडियो बनाइ पोस्ट गर्न आउन थालेका छन्। यसले गर्दा बाछीलाई पालेको परिवार दैनिक कामकाजमै व्यस्त भएको छ।

धेरै स्थानीयले यस घटनालाई धार्मिक चमत्कारको रूपमा लिएर पूजा अर्चना गर्न थालेका छन् भने टिकटक र फेसबुक जस्ता सामाजिक सञ्जालमा भिडियोहरू भाइरल भइरहेका छन्।

पशु विज्ञहरूका अनुसार यो अवस्था हार्मोन असन्तुलनको कारण हुन सक्ने सम्भावना रहेको छ। हाल बाछीको स्वास्थ्य परीक्षण भइरहेको र वैज्ञानिक रूपमा ठोस निष्कर्ष निकाल्न केही समय लाग्ने जनाइएको छ।

नेपालमा यस्ता घटना निकै दुर्लभ मानिन्छन्, र यसले पशु विज्ञानमा थप अनुसन्धान आवश्यक रहेको सन्देश दिएको छ।