छुट्टाछुट्टै सवारी दुर्घटनामा पाँच जनाको मृत्यु

काठमाडौँ, २१ भदौ। देशभर भएका छुट्टाछुट्टै सवारी दुर्घटनामा पाँच जनाको मृत्यु भएको छ।

काठमाडौंको कागेश्वरी मनोहरा नगरपालिका-८ गोठाटारमा शनिबार बिहान ट्रकको ठक्करबाट ५८ वर्षीया जिरा देवी दानीको मृत्यु भएको छ। 

बा.५ ख ३२३९ नम्बरको ट्रकले ठक्कर दिँदा गम्भीर घाइते भएकी उनको शंखरापुर अस्पतालमा उपचारको क्रममा मृत्यु भएको हो। ट्रक चालकलाई प्रहरीले नियन्त्रणमा लिएको छ।

उता, सुनसरीको गढी गाउँपालिका-४ छिटाहामा शुक्रबार साँझ साइकल दुर्घटना हुँदा ७० वर्षीय कलकतिया चौधरीको मृत्यु भएको छ। गम्भीर घाइते भएका उनको कोशी अस्पताल विराटनगरमा उपचारको क्रममा मृत्यु भएको हो।

यस्तै, मोरङको बुढीगंगा गाउँपालिका-४ मा पिकअपको ठक्करबाट ५ वर्षीय बालक शम्भु पौडेलको मृत्यु भएको छ। प्र.१-०२-००२ च ४६६५ नम्बरको पिकअपको ठक्करबाट गम्भीर घाइते भएका उनको विराट टिचिङ अस्पतालमा उपचारको क्रममा मृत्यु भएको हो। पिकअप चालकलाई प्रहरीले नियन्त्रणमा लिएको छ।

चितवनको रत्ननगर नगरपालिका-१ सौराहामा बसको ठक्करबाट ३ वर्षीया समिरा विकको मृत्यु भएको छ। ना.३ ख ५७३७ नम्बरको बसको ठक्करबाट गम्भीर घाइते भएकी उनको नयाँ मेडिकल कलेजमा उपचारको क्रममा मृत्यु भएको हो। बस चालकलाई प्रहरीले नियन्त्रणमा लिएको छ।

यसैगरी, बर्दियाको गुलरिया नगरपालिका-३ मा मोटरसाइकल दुर्घटना हुँदा २१ वर्षीय चालक करण गुप्ताको मृत्यु भएको छ। भे.११ प ३८६३ नम्बरको मोटरसाइकल शुक्रबार राति दुर्घटना हुँदा गम्भीर घाइते भएका उनको बर्दिया अस्पतालमा उपचारको क्रममा मृत्यु भएको हो।

यी सबै घटनाबारे प्रहरीले आवश्यक अनुसन्धान गरिरहेको छ।