ओलीकै सिफारिसमा सुशीला कार्की सरकार बनेको प्रचण्डको खुलासा

काठमाडौं, २५ असोज। नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले पूर्व प्रधानमन्त्री केपी शर्मा ओलीले सुशीला कार्कीलाई प्रधानमन्त्री बनाउन लिखित सिफारिस गरेको खुलासा गरेका छन् ।

शुक्रवार सम्पादकहरूसँगको कुराकानीमा प्रचण्डले भने, “सुशीला कार्की तत्कालीन प्रधानमन्त्री ओलीको लिखित सिफारिसमा प्रधानमन्त्री बन्नुभयो, हामी त साक्षी मात्र हौँ । आफैँले बनाएको सरकारलाई अहिले ‘हाहा–हुहु’मा बनेको भन्नु ओलीलाई सुहाउँदैन । बरु, हामी साक्षीले यस्तो भन्न मिल्ला ।”

प्रचण्डले आगामी २१ फागुनको निर्वाचनलाई सफल बनाउन सबै दल एकजुट हुनुपर्नेमा जोड दिए । उनले निर्वाचनपछि राष्ट्रिय सहमतिका आधारमा संविधान संशोधन गरी जेन–जी पुस्ताका माग सम्बोधन गर्नुपर्ने बताए । “यो संविधान यथास्थितिमा काम लाग्दैन । परिमार्जन आवश्यक छ, र यो सहमतिमै हुनुपर्छ,” उनले भने । जेन–जी आन्दोलनले संविधान कार्यान्वयनको समीक्षा गर्ने बेला आएको उनको भनाइ छ । “हामीले १० वर्षमा संविधानको समीक्षा गर्ने प्रतिबद्धता गरेका थियौँ । अब गम्भीर छलफलको समय आएको छ,” उनले थपे ।

प्रचण्डले विगतमा सहमतिकै आधारमा निर्वाचन र संविधान निर्माण भएको स्मरण गर्दै अहिले पनि राष्ट्रिय सहमति जरुरी रहेको बताए । “आरोप–प्रत्यारोपको समय होइन, बिग्रेका कुरा सच्चाउने बेला हो । सबै दलले आत्मसमीक्षा गर्नुपर्छ,” उनले भने । उनले आफू नयाँ–पुराना दल र जेन–जी प्रतिनिधिसँग निरन्तर संवादमा रहेको पनि खुलाए । “जेन–जीलाई विश्वासमा लिएर सहमतिको वातावरण बनाउन सकिन्छ,” उनले जोड दिए ।

प्रचण्डले विगतको सत्तारूढ गठबन्धनले संविधानको मर्म विपरीत काम गरेको टिप्पणी गरे । “सदनको पहिलो र दोस्रो दल मिलेर दुई तिहाइ बनाएर जे गरे पनि हुन्छ भन्ने मानसिकताले समस्या निम्त्यायो । मैले विश्वासको मत दिँदा नै यसको परिणाम गम्भीर हुन्छ भनेको थिएँ,” उनले भने । जेन–जी आन्दोलनअघि नै आफूले खबरदारी गरेको तर सरकारले नसुनेको उनको गुनासो छ ।

प्रचण्डले आन्दोलनका बेला सेनाले आफूलाई बचाएको भन्दै धन्यवाद दिए । तर, उनले प्रश्न पनि उठाए, “हामीलाई बचाएको सेनाले सिंहदरबार, सर्वोच्च अदालत र शीतलनिवास किन बचाएन?” उनले आन्दोलन चर्किँदै जाँदा सिंहदरबारमा विपक्षी बैठकमा रहँदा सेनाले आफूलाई उद्धार गरेको खुलासा गरे । “मैले स्वयं प्रधानसेनापतिलाई फोन गरेर सुरक्षा मागेको थिएँ । सेनाले हेलिकोप्टर र गाडीमार्फत नेताहरूलाई उद्धार गरेको थियो,” उनले भने । हेडक्वार्टरबाटै राजनीतिलाई सही दिशामा ल्याउन आफूले सक्दो भूमिका खेलेको उनको दाबी छ ।

प्रचण्डले जेन–जी पुस्ताको आन्दोलनले संविधानको समीक्षा र परिमार्जनको आवश्यकता झन् प्रस्ट भएको बताए । “निर्वाचनपछि सबै दल र जेन–जीका मागलाई समेटेर संविधान संशोधन गर्नुपर्छ । यो देशको प्रमुख आवश्यकता हो,” उनले भने । उनले सबै दललाई आत्मसमीक्षा गरी जनतासामु खुलस्त कुरा राख्न र सहमतिका आधारमा अघि बढ्न आग्रह गरे ।