मधेशमा निर्वाचन सुरक्षाका लागि ५० हजारभन्दा बढी सुरक्षाकर्मी परिचालनको योजना

जनकपूरधाम, १९ माघ। आगामी २१ फागुनमा हुने प्रतिनिधिसभा निर्वाचन अन्तर्गत मधेश प्रदेशका लागि कुल दुई हजार १६० मतदानस्थलमध्ये एक हजार २४६ मतदानस्थल अति संवेदनशील छ ।

मधेश प्रदेश प्रहरी कार्यालयका अनुसार भारतीय सीमासँग जोडिएका अधिकांश मतदानस्थल अतिसंवेदनशीलमा वर्गीकरण गरिएका छन् । त्यसको अनुगमन तथा सुरक्षाका उपायबारे योजनाबद्ध काम भइरहेको मधेश प्रदेश प्रहरी कार्यालयले अघि बढाइरहेको जनाइएको छ ।

निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गराउन मधेस प्रदेशभरि भरपर्दो सुरक्षा व्यवस्था मिलाइएको प्रदेश प्रहरी कार्यालयका प्रमुख डिआईजी गोविन्द थपालियाले जानकारी दिएका छन् । उनका अनुसार प्रदेशभरि तीन तहको सुरक्षा परिचालन गरिनुका साथै अति संवेदनशील मतदानस्थलमा ड्रोन र सीसी क्यामेरामार्फत निगरानीको व्यवस्था गरिएको छ ।

मतदाताको चाप, निर्वाचन क्षेत्रको सामाजिक–सांस्कृतिक परिवेश, विगतका घटनाक्रम, भौगोलिक अवस्था, राजनीतिक गतिविधि लगायतका आधारमा वर्गीकरण गरिएका मतदानस्थलहरुको अनुसार सुरक्षा योजना तयार पारिएको उनले भने । डिआईजी थपालियाले खुला सीमानाका कारण हातहतियार भित्रियाउन सकिने, अपराध गरेर यताको मान्छे उता जान सक्ने, उताको मान्छे घुसपैठ हुन सक्ने र विगतका घटनाक्रमले मधेस प्रदेशमा निर्वाचन व्यवस्थापन लगायतका चुनौती रहेको छ, त्यसलाई व्यवस्थापन गर्नेगरी हामीले सुरक्षा योजना तयार पारेको बताए ।

उनले भने हामीले अति संवेदनशील मतदान स्थलहरुमा प्रहरी निगरानी बढाईसकेका छौ, हाल सादा पोशाकमा हाल भइरहेको गतिविधि बारे सूचना संकलनका लागि प्रहरी खटाइसकेका छौं र अन्य सुरक्षा सम्बन्धी व्यवस्थापकीय कार्य जारी रहेको छ । प्रदेशका आठ जिल्लामा कुल २,१६० मतदानस्थल र ४,४७१ मतदान केन्द्र रहेका छन् ।

तीमध्ये ५७ प्रतिशत अर्थात् १ हजार २३७ मतदानस्थल र २ हजार ६१३ मतदान केन्द्र अति संवेदनशील सूचीमा रहेको छ भने ७६३ मतदानस्थल र १ हजार ५५४ मतदान केन्द्र संवेदनशील तथा १६० मतदानस्थल र ३०४ मतदान केन्द्र सामान्य श्रेणीमा वर्गीकरण गरिएको र सोहीअनुसार सुरक्षा योजना संचालन गरिएको उनको भनाई छ ।

प्रदेश प्रहरी कार्यालयका प्रवक्ता कमला थापाले जनाए अनुसार सुरक्षाको दृष्टिकोणले सप्तरी जिल्लाका मतदान केन्द्र सबैभन्दा बढी ‘रेड जोन’ मा रहेका छन् । सप्तरीमा २९६ मतदान स्थलमध्ये २०९ वटा मतदानस्थल अति संवेदनशील सूचीमा रहेको छ भने सिरहाका १५४, धनुषाका १९४, महोत्तरीका १६३, सर्लाहीका १५८, रौतहटका १५२ र बाराका १५४ मतदानस्थल अति संवेदनशील सूचीमा रहेको छ ।

सर्लाहीमा सबैभन्दा बढी १३१ मतदानस्थल संवेदनशील सूचीमा रहेका छन् । सुरक्षा चुनौती भएका मतदानस्थलमा विशेष रणनीति तयार पारिएको उनको भनाई छ । सुरक्षाका तीनवटै निकायबाट गरी मधेसमा ५० हजारभन्दा बढी संयुक्त सुरक्षा फौज खटाइने डीआईजी थपलियाले जनाए। नेपाल प्रहरी र निर्वाचन प्रहरीबाट करिब ४० हजार, सशस्त्र प्रहरी बलबाट १० हजार र यसका अतिरिक्त नेपाली सेनासमेत परिचालन गरिने भएको छ ।

निष्पक्ष, धाँधली रहित र सहज वातावरणमा निर्वाचन सम्पन्न गराउन प्रदेशभरि १२ हजार ६ सय नेपाल प्रहरी र २८ हजार २९५ निर्वाचन प्रहरी (म्यादी प्रहरी) र सशस्त्र सुरक्षा बल समेत परिचालन गरिने जानकारी दिए । सुरक्षा घेरामा सशस्त्र प्रहरी सँगै नेपाली सेनाको समेत सक्रिय सहभागिता रहने उनको भनाई छ ।

बर्दिबासस्थित सशस्त्र प्रहरी बल नेपाल नं. २ छिन्नमस्ता वाहिनी मुख्यालयका डीआईजी कृष्ण ढकालले प्रतिनिधि सभा निर्वाचनका लागि प्रदेशका आठै जिल्लामा ४ हजार ३३६ सशस्त्र प्रहरी र २ हजार ८३२ निर्वाचन प्रहरी तयारी अवस्थामा राखिएको छ । सशस्त्र प्रहरीले निर्वाचनलाई लक्षित गर्दै मुख्य निर्वाचन अधिकृत तथा निर्वाचन अधिकृतको कार्यालय, जिल्ला निर्वाचन कार्यालय, मोबाइल टोली र रिजर्भ फोर्समार्फत जनशक्ति परिचालन गरिसकेको जनाइएको छ ।