कलैयाका मोहम्मद सेफमाथि क्रिप्टो आम्दानीको शुद्धीकरण मुद्दा दायर

वीरगञ्ज, २८ माघ। बारा जिल्लाको सदरमुकाम कलैया उपमहानगरपालिका–२० का २४ वर्षीय मोहम्मद सेफविरुद्ध जिल्ला अदालत काठमाडौँमा करिब २० करोड रुपैयाँ बराबरको सम्पत्ति शुद्धीकरण मुद्दा दायर गरिएको छ ।

जिल्ला सरकारी वकिल कार्यालय काठमाडौँले सेफ क्रिप्टोकरेन्सी कारोबारमा संलग्न रही गैर कानुनी रूपमा १९ करोड ८१ लाख रुपैयाँ आर्जन गरेको अभियोग लगाएको छ । अभियोग पत्रमा सो बराबरको सम्पत्ति जफत गर्न, बिगोको दोब्बर जरिवाना गर्न तथा कसुरको गम्भीरता हेरी २ वर्षदेखि १५ वर्षसम्म कैद सजाय गर्न माग दाबी गरिएको छ । साथै बरामद भएका मोबाइल फोन र सिम कार्डहरू समेत जफत गर्न माग गरिएको छ ।

प्रहरीले सेफलाई गत २०८२ मङ्सिर १० गते साँझ काठमाडौँको भद्रकाली क्षेत्रबाट शङ्कास्पद अवस्थामा पक्राउ गरेको थियो । खानतलासीका क्रममा दुई थान मोबाइल फोन बरामद गरिएको थियो । प्रारम्भिक जाँचका क्रममा उनको ‘बाइनन्स’ एकाउन्टमार्फत यूएसटीडी, बोओएनके र पीईपीईजस्ता क्रिप्टोकरेंसीमा ठुलो रकमको कारोबार भएको फेला परेको थियो ।

अभियोग पत्रअनुसार सेफले कुल १९ करोड ८१ लाख ४९ हजार ६८१ रुपैयाँ बराबरको अवैध क्रिप्टो कारोबार गरेको देखिएको छ । अनुसन्धानका क्रममा उनले नेपाल इन्भेस्टमेन्ट मेगा बैंक, सिटिजन्स बैंक, मुक्तिनाथ विकास बैंक, सिद्धार्थ बैंकलगायत १० भन्दा बढी बैंकमार्फत करोडौँ रुपैयाँको कारोबार गरेको खुलेको छ ।

उनको बैंक स्टेटमेन्ट विश्लेषण गर्दा डेबिटतर्फ करिब ६ करोड ६१ लाख रुपैयाँ र क्रेडिटतर्फ ६ करोड ६५ लाख रुपैयाँभन्दा बढी कारोबार भएको पाइएको छ ।

बयानका क्रममा सेफले करिब ८–९ महिना अघि मुराध आलम नामक व्यक्तिमार्फत क्रिप्टो कारोबारमा जोडिएको स्वीकार गरेका छन् । मुराधले क्रिप्टोमा लगानी गर्दा राम्रो फाइदा हुने प्रलोभन देखाउँदै बाइनन्स एकाउन्ट खोलिदिएको र सोहीमार्फत कारोबार सिक्दै अरूलाई समेत डिजिटल मुद्रा बिक्री गर्ने गरेको खुलेको छ ।

उनले काम गरेबापत मासिक २०० देखि २५० अमेरिकी डलर पारिश्रमिक पाउने गरेको बयान दिएका छन् । मामिलाबारे अदालतमा थप सुनुवाइ प्रक्रिया अगाडि बढ्ने जनाइएको छ ।