नेपाल–भारत सीमामा भन्सार नियम पुरानै रहेको भारतको स्पष्टिकरण

काठमाडौं, ११ वैशाख। भारतको विदेश मन्त्रालयका प्रवक्ता रणधीर जयसवालले नेपाल–भारत सीमा नाकामा लागू गरिएको भन्सार शुल्कको व्यवस्था नयाँ नभई पहिले देखिकै प्रावधान भएको बताएका छन् ।

बिहीबार आयोजित नियमित पत्रकार सम्मेलनमा प्रवक्ता जयसवालले नेपाल सरकारले हाल उक्त प्रावधानलाई कडाइका साथ कार्यान्वयनमा ल्याएको उल्लेख गर्दै यस कदमको उद्देश्य अनौपचारिक व्यापार र तस्करी नियन्त्रण गर्नु रहेको बताए । “यो नयाँ व्यवस्था होइन, तर अहिले प्रभावकारी रूपमा लागू गरिएको हो,” उनले भने ।

उनका अनुसार भारतबाट नेपाल प्रवेश गर्ने यात्रुले एक सय रुपैयाँभन्दा बढी मूल्यका सामान ल्याउँदा भन्सार शुल्क तिर्नुपर्ने प्रावधान पहिले नै रहेको थियो । तर, पछिल्ला दिनहरूमा यसको कार्यान्वयन कडा बनाइएपछि सीमावर्ती क्षेत्रमा यसको प्रभाव देखिन थालेको छ ।

प्रवक्ता जयसवालले व्यक्तिगत प्रयोगका लागि ल्याइने सामग्रीमा भने कुनै अवरोध वा भन्सार शुल्क नलाग्ने स्पष्ट पारेका छन् । “घरायसी वा व्यक्तिगत प्रयोजनका सामान बोकेर यात्रा गर्ने सर्वसाधारणलाई कुनै समस्या हुने छैन,” उनले भने ।

नेपाल सरकारले २०८० सालमै राजपत्रमार्फत १०० रुपैयाँभन्दा माथिका वस्तुमा अनिवार्य भन्सार शुल्क लाग्ने नीति सार्वजनिक गरेको थियो । हाल बालेन्द्र शाह (बालेन) नेतृत्वको सरकारले उक्त नीतिलाई कडाइका साथ कार्यान्वयनमा ल्याएको छ ।