अख्तियारविरुद्ध सर्वोच्च पुगेका मेयर राजेशमान सिंहको रिटमा आज पेसी

वीरगञ्ज, १७ असार। वीरगञ्ज महानगरपालिकाका निलम्बित नगरप्रमुख (मेयर) राजेशमान सिंहले अख्तियार दुरुपयोग अनुसन्धान आयोगले अघि बढाएको अनुसन्धान तथा कारबाही प्रक्रियाविरुद्ध दायर गरेको रिट निवेदनमाथि आज असार १७ गते सर्वोच्च अदालतमा सुनुवाइ हुँदै छ ।

नागरिकता किर्ते तथा भ्रष्टाचार प्रकरणमा मुद्दा खेपिरहेका सिंहले अख्तियार दुरुपयोग अनुसन्धान आयोग, विशेष अदालत र वीरगञ्ज महानगरपालिका नगर कार्यपालिकाको कार्यालयलाई विपक्षी बनाउँदै २०८३ असार ८ गते सर्वोच्च अदालतमा रिट दायर गरेका हुन् ।

सिंहले आफूविरुद्ध अन्यायपूर्ण ढङ्गले मुद्दा दायर गरिएको दाबी गर्दै अनुसन्धान तथा सम्भावित कारबाही प्रक्रिया रोक्न र पुनः नगरप्रमुखको हैसियतमा काम गर्न पाउने व्यवस्था मिलाउन अन्तरिम आदेशको माग गरेका छन् ।

यसअघि असार १५ गतेका लागि तोकिएको पेसी समय अभावका कारण ‘हेर्न नभ्याइने’ सूचीमा परेको थियो । त्यसपछि सर्वोच्च अदालतले आज असार १७ गतेका लागि नयाँ पेसी तोकेको हो ।

गत जेठ २५ गते अख्तियार दुरुपयोग अनुसन्धान आयोगले सिंहसहित ६ जनाविरुद्ध विशेष अदालतमा भ्रष्टाचार मुद्दा दर्ता गरेपछि प्रचलित कानुनी व्यवस्थाअनुसार उनी स्वतः निलम्बनमा परेका थिए । कानुनअनुसार भ्रष्टाचारसम्बन्धी मुद्दा दायर भएका निर्वाचित जनप्रतिनिधिले मुद्दाको अन्तिम किनारा नलागेसम्म पदको अधिकार प्रयोग गर्न पाउँदैनन् ।

यसअघि न्यायाधीश कुमार रेग्मीको एकल इजलासले तत्काल अन्तरिम आदेश दिन आवश्यक आधार नदेखिएको ठहर गर्दै विपक्षी पक्षलाई लिखित जवाफसहित उपस्थित हुन आदेश दिएको थियो ।

आजको सुनुवाइपछि सर्वोच्च अदालतले अन्तरिम आदेश दिने वा नदिनेबारे निर्णय गर्न सक्ने सम्भावना रहेको छ । यस मुद्दाको आजको सुनुवाइलाई वीरगञ्ज महानगरको नेतृत्व र समग्र स्थानीय राजनीतिक अवस्थासँग जोडेर महत्वका साथ हेरिएको छ ।