ग्यास व्यवसायी संघकै पसलबाट १३१ सिलिन्डर नियन्त्रणमा

वीरगञ्ज, ०१ भदौ। खाना पकाउनेको ग्यासको आभाव रहेको बेला ग्यास व्यवसायी संघ धनुषाका अध्यक्ष फुलदेव पण्डितले सँचालन गर्दै आएको सागर ट्रेडर्सबाटै भारी सँख्यामा ग्यास बरामद भएको छ ।

अध्यक्ष पण्डितको गोदामबाट १३१ वटा मनोज कम्पनीको ग्यास बरामद गरिएको अनुगमन टोलीले जनाएको छ । जनकपुरको बजरँगचौकस्थित रहेको सागर ट्रेडर्समा उपभोक्ताहरुको गुनासोको आधारमा अध्यक्षकै पसलमा छापामारी गरेको थियो । नेपाल आयल निगम महेन्द्रनगर डिपोबाट रामराज सिँहको नेतृत्वमा खटि गएको अनुगमन टोलीले सटर बन्द गरि राखिएको अवस्थामा छापामारी गर्दा १३१ भर्ती ग्यास बरामद भएको जनाएको छ ।

अनुगमन टोलीकै एक कर्मचारी अनुसार, ग्यासको अभाव भएको बेला पण्डितले सटर डाउन गरी राखेका थिए । सटर बन्द गरी ग्यास जम्मा गरेको आरोपमा कारवाही प्रक्रिया थालिने जानकारी दिए । उनले आम उपभोक्तालाई ग्यास नदिएर सटरमा ताला लगाएर राखेको अवस्थामा ग्यास बरामद भएको पाईएको हो । जिल्ला प्रशासन कार्यालय धनुषाको समन्वयमा कारवाही हुने उनले बताए ।

यता, अध्यक्ष पण्डितले भने उपभोक्ताहरुलाई ग्यास वितरणको लागि राखिएको बताएका छन् । उनले भने आफ्नो गोदाममा राखिएको ग्यास कालाबजारीका लागि होइन उपभोक्ताहरुलाई सूची अनुसार बाँड्नका लागि थियो । तर कुरै नबुझी छापामारी गरी सो ग्यास नियन्त्रणमा लिएका हुन् ।