पर्सामा गाँजा तस्करी बढ्दो, १६७ किलोसहित पाँच भारतीय पक्राउ

वीरगञ्ज, ०९ भदौ। पर्सासँग जोडिएको भारतीय सीमावर्ती क्षेत्रमा भारतीय प्रहरीले ठूलो परिमाणमा प्रतिबन्धित लागूऔषध गाँजासहित तीन जना भारतीय नागरिकलाई पक्राउ गरेको छ । भारतीय प्रहरीले विशेष सूचनाका आधारमा गरेको कारबाहीका क्रममा दुईवटा सवारीसाधनमा लुकाएर राखिएको १६२ किलो गाँजासहित उनीहरूलाई पक्राउ गरेको हो ।

बलथर थाना प्रहरीले गोप्य सूचनाका आधारमा चेकजाँच गर्ने क्रममा दुईवटा सवारीसाधनबाट उक्त परिमाणको गाँजा बरामद गरेको जनाएको छ ।

पक्राउ पर्नेमा भङ्गाहा थाना क्षेत्रको पिपरपाती गाउँ निवासी २८ वर्षीय सबजाद मियाँ, नगरदेही निवासी ४० वर्षीय रेदिल आलम र ३५ वर्षीय सुग्रीव प्रसाद रहेका छन् ।

बलथर थानाध्यक्ष ओपी गुप्ताका अनुसार पक्राउ परेका तीनैजनाले दुईवटा सवारीसाधन प्रयोग गरी गाँजा ओसारपसार गरिरहेका थिए । प्रहरीले गाँजासहित प्रयोग गरिएका दुवै सवारीसाधन नियन्त्रणमा लिएर घटनाबारे थप अनुसन्धान अघि बढाएको जनाएको छ ।

यसैबीच, पर्साको छिपहरमाई गाउँपालिका–५ भिस्वास्थित सशस्त्र प्रहरी बल, नेपाल एफओबी जयमङ्गलापुरबाट खटिएको सुरक्षा टोलीले समेत गाँजासहित दुई जना भारतीय नागरिकलाई पक्राउ गरेको छ ।

नेपालबाट भारततर्फ जाँदै गरेको भारतीय नम्बरको मोटरसाइकललाई शङ्का लागेर रोकी जाँच गर्दा मोटरसाइकलको ट्याङ्की तथा सिटमुनि लुकाएर राखिएको अवस्थामा पाँच किलो गाँजाजस्तो देखिने प्रतिबन्धित लागूऔषध बरामद भएको सशस्त्र प्रहरीले जनाएको छ ।

सशस्त्र प्रहरी बल, नेपाल नं. १३ गण हेडक्वार्टर पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाका अनुसार पक्राउ परेका दुवै भारतीय नागरिक, बरामद लागूऔषध तथा मोटरसाइकललाई थप अनुसन्धान र आवश्यक कानुनी कारबाहीका लागि नेपाल प्रहरीको जिम्मा लगाइएको छ ।

दुवै घटनामा गरी १६७ किलो गाँजासहित पाँच जना भारतीय नागरिक पक्राउ परेका छन् । सीमावर्ती क्षेत्रमा लागूऔषधको ओसारपसार नियन्त्रणका लागि नेपाल तथा भारतीय सुरक्षा निकायले निगरानी र कारबाहीलाई तीव्रता दिइरहेका छन् ।