प्रधानाध्यापक बन्ने प्रतिस्पर्धामा दुई शिक्षकबीच कुटाकुट, विद्यालयमा तालाबन्दी

रौतहट, १२ जेठ। रौतहटको यमुनामाई गाउँपालिका–५ स्थित श्री यमुनामाई माध्यमिक विद्यालय झुनखुनवामा प्रधानाध्यापक पदको विवादले उग्र रूप लिँदा दुई शिक्षकबीच विद्यालयभित्रै कुटाकुट भएको छ । घटनापछि विद्यालयको शैक्षिक वातावरण तनावग्रस्त बनेको छ ।

मंगलबार बिहान नियमित पठनपाठन चलिरहेका बेला प्रधानाध्यापक पदका दाबेदार वीरेन्द्र यादव र वीरेन्द्र साहबीच विवाद भएको थियो । सामान्य भनाभनपछि विवाद चर्किँदै जाँदा दुवै शिक्षकबीच कार्यकक्षमै हात हालाहाल भएको प्रत्यक्षदर्शीले बताएका छन् । शिक्षकहरू नै भौतिक आक्रमणमा उत्रिएपछि विद्यार्थीहरू त्रसित बनेका थिए ।

घटनापछि आक्रोशित विद्यार्थीहरूले विद्यालय प्रशासनमा तालाबन्दी गर्दै विरोध जनाएका छन् । शिक्षकहरूकै व्यवहारका कारण विद्यालयको शैक्षिक मर्यादा कमजोर भएको भन्दै विद्यार्थीहरूले असन्तुष्टि व्यक्त गरेका हुन् । ‘हामी पढ्न आएका हौं, शिक्षकहरूको झगडा हेर्न होइन,’ एक विद्यार्थीले गुनासो गरे ।

स्थानीय अभिभावकहरूले भने गाउँपालिकाको अस्थिर नीतिका कारण विद्यालयमा समस्या बढ्दै गएको आरोप लगाएका छन् । उनीहरूका अनुसार प्रधानाध्यापक पदमा पटक–पटक फेरबदल हुँदा विद्यालयभित्र गुटबन्दी बढेको हो । गाउँपालिका अध्यक्ष, प्रमुख प्रशासकीय अधिकृत र शिक्षा संयोजकको स्वार्थका कारण एउटै विद्यालयमा दुईजना प्रधानाध्यापक समानान्तर रूपमा सक्रिय हुन खोज्दा विवाद सिर्जना भएको स्थानीयको दाबी छ ।

घटनाबारे प्रतिक्रिया लिन गाउँपालिका अध्यक्ष मोहम्मद साउदसँग सम्पर्क गर्ने प्रयास भए पनि उनी सम्पर्कमा आएका छैनन् ।

लगातारको विवाद र तालाबन्दीका कारण विद्यालयको पठनपाठन प्रभावित भएको छ । स्थानीयले विद्यालयको शैक्षिक वातावरण सुधार गर्न सम्बन्धित निकायले तत्काल पहल गर्नुपर्ने माग गरेका छन् ।