फ्लोर क्रसको आशंकापछि मुख्यमन्त्री यादवले विश्वासको मत कार्यक्रम स्थगित

यद्यपि, जसपा नेपालका प्रदेश सांसद तथा पूर्व मुख्यमन्त्री लालबाबु राउतले आफूहरू सरकारकै पक्षमा रहेको स्पष्ट पारेका छन् । उनले तत्काल सरकार परिवर्तनको खेलमा जसपा नरहेको बताएका छन् ।

उता, कार्यसूची अन्तिम समयमा परिवर्तन गरिएको विषयमा जनमत पार्टीले भने कडा आपत्ति जनाएको छ । जनमत पार्टीका प्रदेश सांसद सञ्जय कुमार यादवले सभामुखले नियमावली विपरीत “छापामार शैली” मा कार्यसूची हेरफेर गरेको आरोप लगाएका छन् । उनले सभामुखले कुन कानुनी आधारमा कार्यसूची परिवर्तन गरेको हो भन्ने प्रश्नसमेत उठाएका छन् ।

जनमतका मन्त्रीको ‘कुर्सी मोह’, जसपा नेपालभित्र पनि खटपट

प्रदेश सरकारमा जनमत पार्टीबाट सहभागी अर्थमन्त्री महेशप्रसाद यादव र खेलकुद तथा समाज कल्याण मन्त्री वसन्त कुमार कुशवाहाले राजीनामा दिने चर्चा भए पनि व्यवहारमा त्यस्तो देखिएन । अर्थमन्त्री यादव बैठकमै उपस्थित भएनन् भने मन्त्री कुशवाहा विपक्षी दलतर्फको बेन्चमा बसे पनि राजीनामा भने दिएनन् ।

प्रदेश सभामा दुवै मन्त्रीका लागि सत्ता पक्ष र प्रतिपक्ष दुवै तर्फ छुट्टाछुट्टै कुर्सी व्यवस्था गरिएको थियो । तर उनीहरूको व्यवहारले जनमत पार्टीभित्र पनि अन्योल देखिएको टिप्पणी गरिएको छ ।

यसैबिच, हालै महन्त ठाकुर नेतृत्वको लोसपा नेपाल र जसपा नेपालको एकीकरणपछि प्रदेश सभामा पनि एकता प्रक्रिया अघि बढेको छ । तर लोसपाबाट निर्वाचित प्रदेश सांसद तथा पूर्व मन्त्री जितेन्द्र सोनलले आफू पनि संसदीय दलको नेता रहेको दाबी गर्दै सभामुखसँग छुट्टै कुर्सी व्यवस्थाको माग गरेका थिए ।

जसपा नेपालभित्र देखिएको आन्तरिक खटपटका कारण सभामुख राम अशिष यादवलाई सदन सञ्चालन गर्नसमेत कठिनाइ भएको बताइएको छ । जसपा नेपालकै एक पक्षले मुख्यमन्त्री यादवलाई विश्वासको मत नदिने अडान लिएपछि राजनीतिक समीकरण थप पेचिलो बनेको छ ।