मधेस प्रदेशमा जसपा नेपाल र लोसपाबीच समायोजन

रौतहट,३० असोज।  मधेस प्रदेश समितिमा जनता समाजवादी पार्टी नेपाल र लोकतान्त्रिक समाजवादी पार्टी नेपालको समायोजन भएको छ ।

दुवै पार्टीलाई मिलाएर १५५ सदस्यीय मधेस प्रदेश समिति बनाइएको छ । जसपा नेपाल ६०–४० को अनुपातमा केन्द्रदेखि स्थानीय तहसम्म समायोजन गर्ने सहमति भएको छ । जसपा नेपालले ६० प्रतिशत र लोसपा नेपालले ४० प्रतिशत भाग पाएका छन् ।

मधेस प्रदेशमा अध्यक्ष जसपा नेपालले पाएको छ भने कोषाध्यक्ष लोसपा नेपालले पाएको छ । सात जना उपाध्यक्षमध्ये तीन जना लोसपाको तर्फबाट रहेका छन् भने मुख्यसचिवमा एक–एक जना पाएका छन् । सात जना सचिवमध्ये जसपा नेपालले चार र लोसपा नेपालले तीन जना पाएको सो पार्टीका केन्द्रीय उपाध्यक्ष जितेन्द्र सोनलले जानकारी गराए ।

अध्यक्षमा बालकिशोर यादव रहेका छन् भने उपाध्यक्षमा ज्ञानेन्द्र यादव, रामपृत पासवान, सिंहासन साह कलवार, रामज्ञान मण्डल, श्रीराम गिरी, सुशीलकुमार यादव र ओमलोक पटेल रहेका छन् । दुई जना मुख्यसचिवमा दिनेशकुमार यादव र हरि मण्डल रहेका छन् ।