सूची पठाए वीरगञ्ज चिनी कारखाना पुनः सञ्चालनमा सहयोग गर्न रुस तयार

वीरगञ्ज चिनी कारखाना करिब दुई दशकदेखि बन्द अवस्थामा छ भने जनकपुर चुरोट कारखाना पनि लामो समयदेखि ठप्प नै छ ।

राजदूत सुरोभत्सेभका अनुसार रुस नेपालसँग जलविद्युत्, कृषि आधुनिकीकरण, चिकित्सा शिक्षा तथा स्वास्थ्य सेवा, पूर्वाधार विकास र प्राविधिक सहयोगका क्षेत्रमा सहकार्य विस्तार गर्न इच्छुक छ । उनले ऊर्जा उत्पादन र प्रसारण, कृषि प्रशोधन उद्योग तथा दक्ष जनशक्ति विकासका क्षेत्रमा सहकार्यको सम्भावना औँल्याए ।

उपराष्ट्रपति यादवले सन् १९५६ मा नेपाल र तत्कालीन सोभियत सङ्घबिच कूटनीतिक सम्बन्ध स्थापना भएदेखि दुई देशबिच मैत्रीपूर्ण र सौहार्दपूर्ण सम्बन्ध कायम रहँदै आएकोप्रति सन्तोष व्यक्त गरे । उनले यस वर्ष दुई राष्ट्रबिच कूटनीतिक सम्बन्धको ७०औँ वर्ष पूरा हुन लागेको उल्लेख गर्दै पारस्परिक सम्मान, समझदारी र मित्रताको आधारमा विकसित सम्बन्धलाई नेपालले सगौरव स्मरण गर्ने बताए ।

“पछिल्लो समयमा दुई राष्ट्रबिच बढ्दो सांस्कृतिक तथा जनस्तरको आदानप्रदानप्रति नेपाल प्रसन्न छ । आगामी दिनमा द्विपक्षीय सम्बन्धमा नयाँ आयाम थपिँदै हाम्रो सम्बन्ध अझ सुदृढ हुनेछ भन्ने विश्वास लिएको छु,” उपराष्ट्रपति यादवले भने ।

उपराष्ट्रपतिले रुसी महासङ्घको राष्ट्रिय दिवसका अवसरमा मैत्रीपूर्ण रुसी जनताको सुख, शान्ति र समृद्धिको कामना समेत व्यक्त गरेका थिए ।

नेपाल र रुसबिच विगतमा औद्योगिक तथा प्राविधिक सहकार्यका विभिन्न उदाहरणहरू रहेका छन् । सोभियत सङ्घको सहयोगमा स्थापना भएका केही उद्योग र प्राविधिक परियोजनाहरूले नेपालको औद्योगिक विकासमा योगदान पुर्‍याएका थिए । त्यस्तै, नेपाली विद्यार्थीहरूका लागि रुसी विश्वविद्यालयहरूमा छात्रवृत्ति प्रदान गर्दै शिक्षा तथा जनस्तरको सम्बन्ध विस्तारमा महत्त्वपूर्ण भूमिका खेलेको छ ।

हालका वर्षहरूमा ऊर्जा, पर्यटन, व्यापार तथा सांस्कृतिक आदानप्रदानका क्षेत्रमा सहकार्य विस्तार गर्ने विषयमा पनि छलफल हुँदै आएको छ । दुवै पक्षले पारस्परिक हितका क्षेत्रमा सहकार्य बढाउँदै लैजाने प्रतिबद्धता व्यक्त गरेका छन् ।

भेटवार्तालाई नेपाल–रुस सम्बन्धको ७०औँ वर्षगाँठको पूर्व सन्ध्यामा द्विपक्षीय सम्बन्धलाई नयाँ उचाइमा पुर्‍याउने प्रयासका रूपमा हेरिएको छ ।