निलकण्ठ अस्पतालमा उपचारका क्रममा महिलाको मृत्यु, मिलापत्रमा लेनदेनको आरोप

वीरगञ्ज, २६ वैशाख। वीरगञ्जका निजी अस्पतालहरूमा उपचारका क्रममा हुने घटनालाई निष्पक्ष अनुसन्धान नगरी आर्थिक लेनदेनमार्फत मिलाउने प्रवृत्ति बढ्दै गएको आरोप लागेको छ । पछिल्लो घटनामा निलकण्ठ अस्पताल मा उपचारका क्रममा एक महिलाको मृत्यु भएपछि घटना रकम लेनदेनमै टुंग्याइएको विषय सार्वजनिक भएको छ ।

वीरगञ्ज महानगरपालिका–३१ चोर्नी निवासी कपिलदेव साहकी करिब ४८ वर्षीया पत्नी प्रमिला देवीलाई पेट दुखेपछि शुक्रबार बिहान करिब ४ बजे उपचारका लागि अस्पतालमा भर्ना गरिएको थियो । परिवारजनका अनुसार अस्पताल पुग्दासम्म उनको अवस्था सामान्य थियो र उनी आफैं मोटरसाइकलमा अस्पताल पुगेकी थिइन् ।

घटनाको समयमा अस्पतालमा विशेषज्ञ चिकित्सक नभई मेडिकल अफिसर मात्र ड्युटीमा रहेको बताइएको छ । सामान्य जाँचपछि इमर्जेन्सीमा औषधि लेखिएको र औषधि खरिद गरी ल्याएपछि एक नर्सले इन्जेक्सन लगाएको परिवारजनको भनाइ छ ।

परिवारले ती नर्स दक्ष नभएको तथा केनुला समेत राम्रोसँग लगाउन नसकेको दाबी गरेका छन् । उनीहरूका अनुसार उक्त दृश्य अस्पतालको सीसीटीभी फुटेजमा समेत देखिएको छ ।

परिवारजनका अनुसार इन्जेक्सन लगाएको केही मिनेटमै प्रमिला देवीको अवस्था अचानक बिग्रिएको, बान्ता भएको र त्यसलगत्तै मृत्यु भएको थियो । घटनापछि आक्रोशित आफन्तहरूले अस्पतालमा विरोध जनाएपछि वडा प्रहरी कार्यालय श्रीपुर को टोली अस्पताल पुगेको थियो ।

परिवार स्रोतका अनुसार अस्पताल प्रशासनले उपचारमा लापरबाही भएको स्वीकार गरेको दाबी गरिएको छ । तर घटनाको निष्पक्ष छानबिन, पोस्टमार्टम वा चिकित्सकीय परीक्षण नगरी स्थानीय प्रहरीको रोहवरमा ४ लाख रुपैयाँ क्षतिपूर्ति दिने सहमतिमा मिलापत्र गरिएको बताइएको छ ।

यस घटनाले उपचारमा वास्तविक लापरबाही भएको हो वा सामान्य चिकित्सकीय जटिलता थियो भन्ने विषयमा गम्भीर प्रश्न उठाएको छ । सरोकारवालाहरूले मृत्युको कारण कानुनी तथा चिकित्सकीय प्रक्रियाबाट यकिन गरी दोषी पाइए कारबाही हुनुपर्ने बताएका छन् ।

यता, चिकित्सकहरूले प्रत्येक मृत्यु घटनालाई दबाब र हल्लाका आधारमा आर्थिक लेनदेनमार्फत समाधान गर्ने प्रवृत्ति बढ्दै गएको भन्दै चिन्ता व्यक्त गरेका छन् । उनीहरूका अनुसार यसले स्वास्थ्य संस्थामाथिको जनविश्वास कमजोर बनाउने खतरा रहेको छ ।

स्रोतका अनुसार मिलापत्रपत्रमा अस्पतालका तर्फबाट डा. सुनिल यादव ले हस्ताक्षर गरेका छन् भने मृतक परिवारलाई ४ लाख रुपैयाँ नगद प्रदान गरिएको छ । तर प्रमिला देवीको मृत्युको वास्तविक कारण भने हालसम्म सार्वजनिक गरिएको छैन ।

जिल्ला प्रहरी कार्यालय पर्सा का प्रवक्ता प्रहरी नायब उपरीक्षक राजु कार्की ले प्रहरी अस्पतालमा शान्ति–सुरक्षा कायम गर्न मात्र जाने गरेको बताए । उनका अनुसार उपचारसम्बन्धी विषय नेपाल मेडिकल काउन्सिल ले हेर्ने गर्छ र उजुरी परे आवश्यक कानुनी प्रक्रिया अघि बढाइनेछ ।

वीरगञ्जका एक चिकित्सकले पैसा लेनदेन गरेर यस्ता घटना मिलाउनु कानुनविपरीत भएको टिप्पणी गर्दै चिकित्सक संघले यस्ता गतिविधिको सधैं विरोध गर्दै आएको बताएका छन् ।