श्रीपुरमा प्रहरी छापा, २ पुरुष र ५ महिलासहित ७ जना पक्राउ

वीरगञ्ज, १४ जेठ। वीरगञ्ज महानगरपालिका–११ श्रीपुरस्थित कृषि औजार कारखाना पछाडिको झाझी टोलमा अवैध देहव्यापार सञ्चालन भइरहेको सूचनाको आधारमा प्रहरीले छापामारी गर्दै ७ जनालाई नियन्त्रणमा लिएको छ। पक्राउ पर्नेहरूमा दुई पुरुष र पाँच महिला रहेका छन्।

जिल्ला प्रहरी कार्यालय पर्सा मातहत रहेको वडा प्रहरी कार्यालय श्रीपुरबाट खटिएको विशेष प्रहरी टोलीले स्थानीय वकिल मियाँको घरमा छापा मारेर उनीहरूलाई नियन्त्रणमा लिएको हो। प्रहरीले उक्त घरमा लामो समयदेखि शंकास्पद गतिविधि भइरहेको सूचनाका आधारमा निगरानी बढाएको थियो।

जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक (डीएसपी) हरीबहादुर बस्नेतका अनुसार प्रारम्भिक अनुसन्धानका क्रममा उक्त घरबाट अवैध देहव्यापार सञ्चालन भइरहेको आशंका पुष्टि भएपछि सम्बन्धित व्यक्तिहरूलाई नियन्त्रणमा लिइएको हो।

डीएसपी बस्नेतले पक्राउ परेका सबैलाई जिल्ला प्रहरी कार्यालय पर्सामा राखेर विस्तृत विवरण संकलन, आवश्यक सोधपुछ तथा कानुनी प्रक्रिया अघि बढाइएको जानकारी दिएका छन्। घटनासँग सम्बन्धित अन्य व्यक्ति वा समूहको संलग्नता भए नभएको विषयमा समेत अनुसन्धान भइरहेको प्रहरीले जनाएको छ।

प्रहरीका अनुसार पछिल्लो समय वीरगञ्जका विभिन्न क्षेत्रमा यस्ता अवैध गतिविधि बढ्दै गएको गुनासो आएपछि विशेष निगरानी अभियान सञ्चालन गरिएको छ। समाजमा विकृति फैलाउने तथा आपराधिक गतिविधिसँग जोडिएका यस्ता कार्य नियन्त्रण गर्न प्रहरीले थप कडाइ गर्ने जनाएको छ।

स्थानीयवासीले पनि उक्त क्षेत्रमा रातिको समयमा अपरिचित व्यक्तिहरूको आवतजावत बढेको र शंकास्पद गतिविधि देखिने गरेको बताएका छन्। प्रहरीले यस्ता गतिविधिबारे सूचना दिन सर्वसाधारणलाई आग्रह गर्दै गोपनीयता कायम राखिने जनाएको छ।