वीरगञ्जको तराई हस्पिटल र चिकित्सकमाथि लापरबाहीको आरोप, सुत्केरीको अवस्था गम्भीर

वीरगञ्ज, १७ असार। वीरगञ्जस्थित तराई हस्पिटलमा सुत्केरी गराउन भर्ना भएकी एक महिलाको अवस्था चिकित्सकको कथित लापरबाहीका कारण चिन्ताजनक बनेको भन्दै परिवारजनले गम्भीर आरोप लगाएका छन् ।

बाराको विश्रामपुर गाउँपालिका–५ नकटुवा निवासी चन्दनकुमार साहकी ३० वर्षीय श्रीमती इन्दु देवी साहलाई सोमबार साँझ ७:३० बजे स्त्री तथा प्रसूति रोग विशेषज्ञ डा. तरनुम खातुनको परामर्शमा निजकै क्लिनिकबाट तराई हस्पिटलमा भर्ना गरिएको थियो । मङ्गलवार बिहान ३:४५ बजे सामान्य (नर्मल) डेलिभरीमार्फत छोरीको जन्म भएको थियो ।

तर, डेलिभरीपछि अत्यधिक रक्तस्राव (पोस्टपार्टम हेमोरेज) सुरु भएपछि इन्दुको अवस्था क्रमशः नाजुक बन्दै गएको अस्पताल स्रोतले जनाएको छ । हाल उनलाई भेन्टिलेटरमा राखेर उपचार भइरहेको अस्पताल व्यवस्थापनले जानकारी दिएको छ ।

परिवारजनले भने चिकित्सकको लापरबाहीका कारण इन्दुको अवस्था अचेत र चिन्ताजनक बनेको आरोप लगाएका छन् । इन्दुका श्रीमान् चन्दनकुमार साहले “उपचारमा गम्भीर लापरबाही भएको” दाबी गर्दै वास्तविक अवस्था लुकाउन अस्पताल प्रशासनले प्रयास गरिरहेको आरोप लगाएका छन् । उनले हालसम्म उपचारमा करिब एक लाख रुपैयाँ खर्च भइसकेको बताए ।

परिवारका सदस्यहरूका अनुसार इन्दुको मस्तिष्क मृत्यु (ब्रेन डेथ) भइसकेको भए पनि अस्पतालले उनलाई भेन्टिलेटरमा राखेर उपचार गरिरहेको छ । उनीहरूले अस्पतालले आर्थिक लाभका उद्देश्यले बिरामी जीवितै रहेको दाबी गरिरहेको आरोप समेत लगाएका छन् ।

यता, डा. तरनुम खातुनले भने अस्पताल र चिकित्सकबाट कुनै लापरबाही नभएको स्पष्ट पारेकी छन् । उनका अनुसार इन्दुको रगतमा हेमोग्लोबिन र प्लेटलेट्सको मात्रा अत्यन्त कम थियो तथा डेलिभरीका क्रममा आन्तरिक चोट (इन्टर्नल इन्जुरी) का कारण अत्यधिक रक्तस्राव भएको हो । “बिरामीको अवस्था गम्भीर छ, तर ७२ घण्टापछि मात्र वास्तविक अवस्थाबारे स्पष्ट भन्न सकिन्छ,” उनले भनिन् ।

जिल्ला प्रहरी कार्यालय पर्साका प्रवक्ता प्रहरी नायव उपरीक्षक (डिएसपी) हरि बहादुर बस्नेतले बिरामीको मृत्यु नभएको र उपचार जारी रहेको जानकारी दिएका छन् । उनका अनुसार अस्पताल प्रशासन र बिरामीका कुरुवा तथा आफन्तहरूबिच सामान्य विवाद मात्र भएको हो ।

अस्पताल र चिकित्सक विवादमा तानिँदै आएको पृष्ठभूमि

तराई हस्पिटल यसअघि पनि उपचारमा लापरबाही भएको भन्दै विभिन्न समयमा विवादमा तानिएको थियो । स्थानीयस्तरमा केही घटनामा बिरामी पक्ष र अस्पताल प्रशासनबिच तनावको अवस्था सिर्जना भएको घटनाहरू सार्वजनिक भएका थिए ।

त्यस्तै, डा. तरनुम खातुनको नाम पनि विगतमा सामाजिक सञ्जाल र स्थानीय स्तरमा उठेका केही विवादहरूसँग जोडिएको थियो ।

छानबिनको माग

घटनापछि पीडित परिवारले निष्पक्ष छानबिनको माग गरेका छन् । स्थानीय स्वास्थ्य कार्यालय तथा सम्बन्धित निकायले घटनाबारे चासो देखाउनुपर्ने उनीहरूको माग छ ।