जनकपुरमा एक महिनापछि पुनः सुरु भयो सवारीचालक अनुमतिपत्र परीक्षा

जनकपुरधाम, २८ साउन। मधेस प्रदेश सरकार मातहत रहेको यातायात व्यवस्था कार्यालय जनकपुरमा एक महिनापछि नयाँ सवारी चालक अनुमतिपत्र लिनेहरूका लागि लिखित तथा प्रयोगात्मक परीक्षा लिन सुरु भएको छ ।

यातायात व्यवस्था कार्यालयले बुधबार सार्वजनिक सूचना जारी गर्दै अनलाइनमा फारम भरेर राजस्व भुक्तानी गरेकाहरूलाई लिखित तथा प्रयोगात्मक परीक्षामा सहभागी हुन आह्वान गरेको छ । कार्यालयले लिखित परीक्षाका लागि आज (बिहीबार) तथा प्रयोगात्मक परीक्षाका लागि भोलि (शुक्रबार) कार्यतालिका रहेको सूचनामा उल्लेख गरेको छ ।

कार्यालयले अहिले सवारी चालक अनुमति पत्र ‘ए’ र ‘के’ वर्गमा फारम भरेकाहरूको मात्र लिखित तथा प्रयोगात्मक परीक्षा लिइने जनाएको छ । अन्य वर्गका लागि पछि सूचना जारी हुने कार्यालयका वरिष्ठ शाखा अधिकृत चन्देश्वर साहले बताए ।