पर्सामा विद्युत् संकट गहिरिँदै, समाधानका लागि सांसद कानुको सरकारसँग आग्रह

वीरगञ्ज, ०४ भदौ। प्रतिनिधिसभा सदस्य सुशील कुमार कानुले पर्सा जिल्लामा व्याप्त विद्युत् समस्याका कारण जनजीवन अस्तव्यस्त बनेको भन्दै सरकारको गम्भीर ध्यानाकर्षण गराएका छन् ।

मङ्गलवार प्रतिनिधिसभाको बैठकमा शून्य समयमा बोल्दै पर्सा निर्वाचन क्षेत्र नम्बर २ का सांसद कानुले विगत केही महिनादेखि जिल्लाभरि विद्युत् आपूर्ति अत्यन्तै जटिल र अनियमित बनेको बताए ।

संसद्लाई सम्बोधन गर्दै सांसद कानुले भने, “पर्सा जिल्लामा कतै ट्रान्सफर्मर बिग्रिएको छ, कतै पोल तथा विद्युत् लाइनको अभाव छ भने कतिपय स्थानमा दिनौँसम्म विद्युत् आपूर्ति अवरुद्ध हुने गरेको छ । जिल्लाभरिबाट हामीलाई दैनिक रूपमा जनताका गुनासो र फोनहरू आइरहेका छन् ।”

उनले विशेषगरी आर्थिक नगरी वीरगञ्जको मुख्य सडक (मेन रोड) क्षेत्रमा विद्युत् लाइनको समस्याका कारण स्थानीय बासिन्दा र व्यवसायीहरूले ठूलो सास्ती भोग्नुपरेको उल्लेख गरे । अत्यधिक गर्मीको समयमा विद्युत् अनियमित हुँदा सर्वसाधारणको जनजीवन कष्टकर बनेको, विद्यार्थीको पढाइ प्रभावित भएको र किसानको खेतीपातीमा समेत गम्भीर असर परेको उनले बताए ।

“अहिलेको प्रचण्ड गर्मीमा घण्टौँसम्म बिजुली नहुँदा जनता मारमा परेका छन्,” सांसद कानुले थपे, “व्यापारिक प्रतिष्ठानदेखि दैनिक जनजीवनसम्म प्रभावित भएको यस गम्भीर समस्यालाई तत्काल समाधान गर्न म नेपाल सरकारको ध्यानाकर्षण गराउन चाहन्छु ।”

सांसद कानुले विद्युत् प्राधिकरण र सम्बन्धित निकायलाई तत्काल पूर्वाधार सुधार गरी निर्बाध विद्युत् आपूर्तिको व्यवस्था मिलाउन जोडदार माग समेत गरेका छन् ।