पोसाक खरिद प्रकरणमा लेखा समितिको मौनता, सांसद सुनारले उठाए प्रश्न

विगतको सुडान काण्डको प्रसङ्ग उल्लेख गर्दै उनले त्यसबेला छानबिन समिति गठन गरी प्रतिवेदन तयार पारिएको र मुद्दा दायर भएपछि भ्रष्टाचार प्रकरणमा चार जना प्रहरी महानिरीक्षकहरू थुनिएको स्मरण गराए। सार्वजनिक लेखा समितिले कुनै पनि बहानामा आलटाल गर्न र खुट्टा कमाउन नमिल्ने भन्दै प्रहरी महानिरीक्षकले ‘तिमीहरूको पनि हेरौँला’ भनेकै कारण समिति डराएको हो कि भन्दै उनले प्रश्न गरे।

समितिमा विधिवत् रूपमा उजुरी परेको र छानबिनका क्रममा अनियमिततासम्बन्धी प्रमाण फेला परेको अवस्थामा आवश्यक सिफारिससहित अख्तियार दुरुपयोग अनुसन्धान आयोगमा पठाउनुपर्ने उनको भनाइ थियो। म्यादी प्रहरीको कपडा खरिद प्रकरणमा छानबिन गर्न समितिको पूर्ण बैठकबाट निर्णय गर्ने वा छुट्टै उपसमिति गठन गर्ने भन्ने विषयमा स्पष्ट निर्णय लिन उनले सभापतिसँग माग गरे।

सार्वजनिक लेखा समितिको गरिमा र प्रभावकारिता कायम राख्दै समितिले जनताप्रति जवाफदेही भएर काम गर्नुपर्नेमा जोड दिँदै उनले समितिले आफ्नो जिम्मेवारी प्रभावकारी रूपमा निर्वाह गर्न नसके आफूहरू त्यसको जिम्मेवारी लिनसमेत तयार रहेको स्पष्ट पारे।