शेरबहादुर देउवा सहित कांग्रेसका ५ नेता चुनावी प्रचारमा निस्किएनन्

आरजु विशुद्ध धार्मिक भ्रमणका क्रममा भारत पुगेको स्रोत बताउँछ । तर, देउवाले भने फलोअप उपचारका साथै भ्रमणका क्रममा निर्वाचनपछि कसरी अगाडि बढ्ने भन्नेमा राजनीतिक कुराकानी पनि गर्न सक्ने उनी निकट नेताहरू दाबी गर्छन् ।

तर निवर्तमान कार्यवाहक सभापति खड्काले प्रतिनिधि सभा निर्वाचनको सन्दर्भमा आइतबार अपिल जारी गरे पनि त्यसमा आफू प्रचारप्रसारमा जाने/नजाने र मतदानमा सहभागी हुने–नहुने केही उल्लेख गरेका छैनन् । खड्काको अपिलमा सबैलाई मतदानमा भाग लिन र कांग्रेसलाई जिताउन आग्रह गरिएको छ ।

खड्काको सचिवालयले उनी प्रचारप्रसारमा भाग लिन जाने र नजाने र मतदानमा जाने नजानेबारे केही बताउन चाहेन ।

पूर्वमहामन्त्री प्रकाशमान सिंह पनि अहिलेसम्म चुनावी प्रचारप्रसारमा निस्किएका छैनन् । काठमाडौँ–१ बाट २०६४ सालमा भएको पहिलो प्रतिनिधि सभा निर्वाचनदेखि ०७९ को निर्वाचनसम्म निरन्तर जितेका सिंह अहिले पनि टिकटका आकाङ्क्षी थिए । टिकट नपाएपछि उनी अहिलेसम्म चुनावी प्रचारप्रसारमा निस्किएका छैनन् । उनको क्षेत्रमा कांग्रेसबाट उम्मेदवार बनेका प्रवल थापाले पटकपटक आग्रह गर्दा पनि बाहिर ननिस्किएकाले अब एक दिनका लागि निस्कने सम्भावना नरहेको नेताहरू बताउँछन् ।

उनकी श्रीमती तथा ०७९ मा बालेन्द्र शाहसँग काठमाडौँ महानगरको नगर प्रमुख पदमा प्रतिस्पर्धा गरेकी सिर्जना सिंह भने चुनावी प्रचारप्रसारमा हिँडिरहेकी छन् ।

पूर्वमहामन्त्री तथा नवलपुर–१ बाट उम्मेदवारका आकाङ्क्षी डा. शशांक कोइराला पनि अहिलेसम्म चुनावी प्रचारप्रसारका लागि निस्किएका छैनन् । २०६४ सालमा भएको पहिलो संविधान सभा निर्वाचनदेखि ०७९ सम्म त्यही क्षेत्रबाट निरन्तर जित्दै आएका डा. कोइराला अहिलेसम्म नवलपुरमा पनि पुगेका छैनन् । उनी जाने–नजाने अहिलेसम्म निश्चित छैन । डा. कोइरालाको सचिवालयले भने यसबारे केही बताउन चाहेन ।

आफूहरूको असहमतिबिच भएको विशेष महाधिवेशनलाई देउवा समूह र डा. कोइराला समूहले विधानविपरीत भनेको छ । देउवा र खड्काले विशेष महाधिवेशनलाई विधानविपरीत भन्दै दायर गरेको रिट सर्वोच्च अदालतमा विचाराधीन छ । आफूहरूले दायर गरेको रिट विचाराधीन भएकाले पनि नेताहरू प्रचारप्रसारमा नगएका हुन् ।

देउवा, खड्का, सिंह, डा.कोइराला र डा.राणा चुनावी प्रचारप्रसारमा नगए पनि विशेष महाधिवेशनको विपक्षमा रहेका रमेश लेखक, दीपक खड्का, बालकृष्ण खाणसहितका नेताहरू चुनावी प्रचारप्रसारमा गृहजिल्लामा छन् । उनीहरू पार्टीका उम्मेदवारहरूसँग घरदैलोमा र चुनावी कार्यक्रममा सहभागी भएका छन् ।