पर्साको ठोरीमा हराएका वृद्ध मृत फेला

वीरगञ्ज, १३ असोज। पर्साको ठोरी गाउँपालिका–५ का ७३ वर्षीय नीरबहादुर लोप्चन मृत फेला परेका छन्। पाँच दिनदेखि घर परिवारसँग सम्पर्कविहीन रहेका लोप्चन सोमबार मृत अवस्थामा भेटिएका हुन्।

जिल्ला प्रहरी कार्यालय पर्साका अनुसार असोज ९ गतेदेखि हराइरहेका लोप्चनको शव ठोरी गाउँपालिका–५ मा पर्ने आठघरे र बागमोर्चा बीचको कल्भर्ट नजिक फेला परेको हो।

प्रहरीका अनुसार शव र घटनास्थलको अवस्था हेर्दा जङ्गली जनावरको आक्रमणका कारण मृत्यु भएको हुन सक्ने प्रारम्भिक अनुमान गरिएको छ।

शवलाई पोष्टमार्टमका लागि वीरगञ्ज पठाइएको र घटनाबारे थप अनुसन्धान भइरहेको जिल्ला प्रहरी कार्यालय पर्साले जनाएको छ।