तस्कर समूहले बारामा प्रहरीको पेस्तोल खोस्यो, एक सातासम्म गोप्य राखियो घटना

वीरगञ्ज, १८ पुस। बारा जिल्लाको सीमावर्ती क्षेत्रमा नेपाल प्रहरीकै एक अधिकृतको हातबाट सरकारी पेस्तोल खोसेर तस्कर समूह फरार भएको सनसनीपूर्ण घटना सार्वजनिक भएको छ । घटना भएको एक हप्ताभन्दा बढी समय बितिसक्दा पनि बारा प्रहरीले घटनालाई गुपचुप राखेको आरोप समेत लागेको छ लागेको छ ।

जिल्ला प्रहरी कार्यालय बारा मातहतको इलाका प्रहरी कार्यालय कवहीगोठमा कार्यरत प्रहरी नायब निरीक्षक (सई) सोनुकुमार मिश्रले ड्युटीकै क्रममा बोकेको सरकारी ‘नाइन एन’ पेस्तोल तस्कर समूहले खोसेर लगेको आरोप लागेको हो । पुस ११ गते शुक्रवार साँझ तस्करी नियन्त्रणका क्रममा पेस्तोल ताक्ने बित्तिकै तस्करहरूले उनको हतियार थुतेर फरार भएको स्रोतको दाबी छ ।

प्रहरी स्रोतका अनुसार सई मिश्र आफ्नो कार्यक्षेत्रमा कमजोर अधिकृतको रूपमा चिनिँदै आएका थिए । यसको जानकारी हुँदाहुँदै पनि जिल्ला प्रहरी कार्यालयले उनलाई प्रतिस्थापन नगर्दा तस्करहरूले सजिलै अवसर पाएको आरोप छ । सीमावर्ती क्षेत्रमा प्रहरी व्यवस्थापनमा चरम लापरबाही भएको भन्दै आलोचना बढेको छ ।

अचम्मको कुरा, घटना भएको एक साताभन्दा बढी समय बितिसक्दा पनि लुटिएको पेस्तोल फेला परेको छैन । तस्कर समूह प्रहरीको हतियार लिएर खुलेआम हिँडिरहेको आशङ्का गरिए पनि प्रहरीले हालसम्म हतियार बरामद गर्न सकेको छैन ।

घटना बाहिरिएपछि मात्रै मधेस प्रदेश प्रहरी कार्यालय सक्रिय भएको देखिएको छ । बिहीबार मधेस प्रदेश प्रहरी कार्यालयका प्रहरी उपरीक्षक (एसपी) भेषराज रिजालको संयोजकत्वमा छानबिन समिति गठन गरिएको छ ।

बारा प्रहरीका निमित्त प्रवक्ता प्रहरी निरीक्षक सुरेश राज भट्टले पेस्तोल हराएको पुष्टि गर्दै छानबिन सुरु भएको बताए । यद्यपि, उनले तस्कर समूहले पेस्तोल नलुटेको दाबी गरे । “त्यस्तो होइन, तस्कर समूहले लुटेको भन्ने कुरा गलत हो, हामी छानबिन गर्दै छौँ,” भट्टले यात्रा डेलीसँग भने ।

उनले सई मिश्रले पेस्तोल कार्यालयभित्रै हराएको दाबी गरेको पनि जानकारी दिए । तर, गस्तीमा गएको समयमा खसेर हराएको हुनसक्ने प्रहरीको अनुमान छ । “यसअघि पनि यस्ता घटनाहरू भएका छन् । अनुसन्धानका लागि समिति गठन भएको छ, छिट्टै तथ्य बाहिर आउँछ,” भट्टले भने ।

गत वर्ष वैशाखमा पनि बाराको इलाका प्रहरी कार्यालय अमलेखगञ्जमा कार्यरत सई पूर्ण बिसीको अटोमेटिक पेस्तोल हराएको थियो । त्यतिबेला पनि तस्करहरूलाई पक्राउ गर्ने क्रममा हतियार खसेर हराएको दाबी गरिएको भएपनि तस्कर समूहले नै खोसेको आशङ्का गरिएको थियो ।

घटना बारामा प्रहरीको लापरबाही र कमजोर व्यवस्थापनको एउटा उदाहरण मात्र हो । भारतीय राज्य बिहारसँग जोडिएको बाराको विभिन्न नाकाबाट प्रहरीकै मिलेमतोमा दैनिक रूपमा भन्सार छलेर विभिन्न सामग्रीसहित प्रतिबन्धित लागूऔषधको ओसारपसार निर्बाध रूपमा हुने गरेको छ । प्रहरीको यस्तो लापरबाही र संलग्नताकै कारण पछिल्लो समय बारा जिल्ला लागूऔषध र भन्सार छली तस्करीको प्रमुख हबको रूपमा विकास हुँदै गएको छ ।

सीमावर्ती क्षेत्रमा प्रभावकारी गस्ती र अनुगमनको अभावमा तस्करहरू निर्धक्कसँग क्रियाकलाप गरिरहेका छन् । प्रहरीले कमजोर वा अयोग्य अधिकृतहरूलाई जिम्मेवारी दिँदा र घटनाहरूलाई लुकाउने प्रयास गर्दा सङ्गठनको विश्वसनीयता गुम्नुका साथै स्थानीय बासिन्दाको ज्यान नै जोखिममा परेको छ । तस्करहरूले प्रहरीकै हतियार बोकेर हिँड्ने अवस्था सिर्जना हुनुले सुरक्षा स्थिति कति कमजोर बनेको छ भन्ने प्रस्ट हुन्छ ।

प्रहरी संगठनले यस्ता घटनालाई गम्भीरतापूर्वक लिएर दोषीमाथि कडा कारबाही गर्नुको सट्टा ढाकछोप गर्ने प्रवृत्ति देखाउँदा तस्करी झन् मौलाउने खतरा बढेको छ । बारामा तस्करी नियन्त्रणका लागि तत्काल कडा कदम चाल्नुपर्ने माग स्थानीय स्तरबाट उठ्न थालेको छ ।