कपनबाट चोरी भएको मोटरसाइकलसहित एक युवक पक्राउ

काठमाडौँ, २० पुस। काठमाडौँको कपनबाट मोटरसाइकल चोरी गरेको आरोपमा प्रहरीले एक युवकलाई नियन्त्रणमा लिएको छ। गत पुस १७ गते बिहान साढे ११ बजे कपन क्षेत्रबाट बा.प्र. ०२–०४३ प ६१३६ नम्बरको २२० सीसीको पल्सर मोटरसाइकल चोरी भएको भन्दै प्रहरी वृत्त बौद्धमा निवेदन परेको थियो ।

सोही निवेदनका आधारमा खोजतलास गर्ने क्रममा काठमाडौँ उपत्यका प्रहरी कार्यालयको टोलीले पुस १९ गते बिहान ११ बजे काठमाडौँ महानगरपालिका–२६ पवित्रनगरस्थित सडक किनारबाट मोटरसाइकलसहित अभियुक्तलाई फेला पारेको हो ।

पक्राउ पर्नेमा नुवाकोट जिल्ला सूर्यगढी गाउँपालिका वडा नं. ३ घर भई हाल ललितपुर बस्ने २६ वर्षीय जीवन लामिछाने रहेका छन्। उनलाई चोरीको मोटरसाइकलसहित फेला पारी नियन्त्रणमा लिएको प्रहरीले जनाएको छ । पक्राउ परेका लामिछानेमाथि थप अनुसन्धान र कानुनी कारबाहीको प्रक्रिया अगाडि बढाइएको छ।