खोटाङका अध्यक्ष नै श्रम संस्कृति पार्टीमा प्रवेश

श्रम संस्कृति पार्टीमा प्रवेश गरेका जसपा जिल्ला अध्यक्ष निर्मल राई दिक्तेल रुपाकोट मझुवागढी नगरपालिका–५ लफ्याङका पूर्व वडाध्यक्ष हुन् । यस्तै, मुगाधन लगातार दुई पटक वडाध्यक्षमा निर्वाचित जनप्रतिनिधि हुन् ।

फागुन २१ गते तोकिएको प्रतिनिधिसभा सदस्यको निर्वाचन अन्तरगत चुनावी अभियान चलिरहेकाबेला जिल्ला अध्यक्ष नै अर्को पार्टीमा प्रवेश गरेपछि जसपाका प्रत्यक्ष उम्मेदवार राकेश राई अप्ठेरोमा परेका छन् । श्रम संस्कृति पार्टीले खोटाङमा आरेन राईलाई प्रत्यक्ष उम्मेदवार उठाएको छ ।

चुनावी कमाण्ड सम्हालिरहेका अध्यक्षले नै पार्टी छाडेपछि जसपाले उपाध्यक्ष गुरुराज राईलाई अध्यक्षको जिम्मेवारी सुम्पिएको जनाएको छ ।

कांग्रेस खोटाङका संगठन विभाग प्रमुख पनि श्रम संस्कृति पार्टीमा 

यस्तै, कांग्रेस खोटाङका संगठन विभाग प्रमुख विष्णुराज राई पनि श्रम संस्कृति पार्टीमा प्रवेश गरेका छन् ।

२०७० सालको संविधानसभा सदस्य निर्वाचनमा बागी उम्मेदवारी दिएका कारण पाँच वर्ष निष्कासनमा परेका विष्णुराजले अन्तत: श्रम संस्कृति पार्टी रोजेका हुन् ।

विगतमा फरक पार्टीमा रहे पनि पहिचानको आन्दोलनमा अग्रपंक्तीमा लड्दै आएका निर्मल र विष्णुराज एकै ठाउँमा उभिएका छन् ।

कोशी नाम खारेज गरी किरात प्रदेश नामाकरण गर्न आह्वान गरिएको आन्दोलनका क्रममा निर्मल किरात फोर्सको खोटाङ संयोजक बनेका थिए । किरात फोर्सलाई पूर्व नेपाल आर्मी धनीराम नछुङले ‘रोलकल’ गराएका थिए । नछुङ यसअघि नै श्रम संस्कृति पार्टीमा प्रवेश गरेर सचिवको जिम्मेवारीमा पुगिसकेका छन् ।