प्रधानमन्त्री बालेनलाई मौलापुरकी मेयरको ५ बुँदे आग्रह

काठमाडौं, ३० भदौ। मौलापुर नगरपालिकाकी मेयर रिना कुमारी साहले बिभिन्न पाँच बुँदामा सरकारको ध्यानाकर्षण गरेकी छन् । प्रधानमन्त्री बालेन्द्र शाहलाई सम्बोधन गरेर सार्वजनिक अपिल जारी गर्दै उनले मौलापुर नगरपालिका पुरै अस्तव्यस्त रहेको बताएकी छन् ।

संघीय सरकारका कारण पूर्णरुपमा ठप्प भएको भनेर उनले ध्यानाकर्षण गरेकी हुन् । ‘मेरो पहिलो कार्यकालको प्रथम आ.व. २०७४/०७५ देखि आ.व. २०८१ / ०८२ सम्म ९० प्रतिशत भन्दा बढी वित्तिय तथा भौतिक प्रगति गर्दै आएको यस नगरपालिकाले यहाँको सरकार गठन पश्चात संघीय सरकारको अनुचित हस्तक्षेप र कुदृष्टि परेको कारण गत आ.व. २०८२ /०८३ मा बजेट खर्च ५०.६८ प्रतिशतमा झरेको छ’, अपिलमा उल्लेख छ ।

संघीय सरकारले आफू नेतृत्वको नगरपालिकाका लागि खटाईएको उपसचिव प्रमुख प्रशासकीय अधिकृतले जनताका आधारभूत सेवाहरु विजुली, खानेपानी, सिंचाइ महसुलका साथै एकिकृत दलित वस्ति निर्माण, पशु पकेट विकास कार्यक्रम अगाडि बढाउन नचाहेको बताएकी छन् ।

साथै, बहुक्षेत्रिय पोषण कार्यक्रम, खानेपानीका लागि डिप बोरीङतर्फ शून्य बजेट खर्च गरेका कारण दलित विपन्न, कुपोषणको जोखिममा रहेका सिमान्तकृत समुदाय, कृषक एवं सुख्खाबाट प्रभावित आम जनसमुदाय सेवाबाट बञ्चित हुन पुगेको स्मरण गराएकी छन् ।

स्थापनाकाल देखि ९ वटा बजेट अधिवेशन प्रत्येक वर्ष असार मसान्तभित्र सम्पन्न गर्दै आएको नगरपालिकाको १०औं बजेट अधिवेसन हाकिम विहिनताको कारण असार मसान्तभित्र पारित हुन नसकेको उल्लेख गरेकी छन्

‘२०८३ साल असार १२ गतेबाट सम्पर्क विहिन रहेको हाकिम खोज्न म स्वयं असार २२ गते मन्त्रालय पुग्दा सचिवज्यू र मन्त्रिज्यूले दर्शन भेट दिन पनि अस्विकार गर्नुभयो’ उनले भनेकी छन्, ‘सम्पर्क विहिन रहेका प्रप्रअलाइ कारबाही गरि कार्यालयमा फर्काउनुको सट्टा निजलाइ प्रोत्साहन दिइ अन्यत्र सरुवा गरियो जसका कारण जनजिविकासंग जोडिएको करोडौं रकम खर्च हुन नसकी फीज हुन पुग्यो ।’

बदनियतपूर्ण तरिकाले असार मसान्त समाप्ति पछि संघीय सरकारले खटाएको प्रप्रअ २०८३ साल साउन ४ गतेबाट कार्यालयमा हाजिर भएको तर २०८३ साल भदौ ५ गतेबाट विना जानकारी अनुपस्थित रहेको बताएकी छन् । उनले लेखेकी छन्, ‘हाकिम विहिनताको अवस्था कायमै छ ।’

यहाँनेर उनले बालेन्द्र शाह काठमाडौं महानगरपालिकको मेयर भएको समय स्मरण गरेकी छन् । ‘सम्माननीयज्यू आफैँ काठमाण्डौ महानगरको प्रमुख हुनुहुँदा प्रमुख प्रशासकीय अधिकृत नहुँदाको पीडा र अनुभव भोगिसक्नु भएकोले निम्नानुसारका सल्लाहका लागि विनम्र अनुरोध छ ।’

पूर्व नगर प्रमुखको नाताले हाकिम विहिनताको अवस्थाको कारण प्रधानमन्त्री आफैँले भोगिसकेको अनुभवलाई आत्मसात गर्दै आफ्नो नगरपालिकालाई थप अस्तव्यस्त हुनबाट जोगाउन अविलम्ब प्रमुख प्रशासकीय अधिकृतको व्यवस्था गर्न माग गर्दै उनले ५ बुँदे सार्वजनिक अपिल गरेकी हुन् ।