सीका लागि ट्रम्पको भव्य स्वागत : ‘रेड कार्पेट’ कूटनीतिको सन्देश के हो?

बेइजिङस्थित युनिभर्सिटी अफ इन्टरनेसनल बिजनेस एन्ड इकोनोमिक्सका अर्थशास्त्रका प्रोफेसर जोन गोङले भने, ‘दुई महिनाको व्यापारिक युद्धविराम विस्तार विश्लेषकहरूले सुरुमा अपेक्षा गरेभन्दा छोटो छ । तर जुनसुकै किसिमको विस्तारले पनि दुवै पक्ष आफ्ना मतभेदहरू प्रभावकारी रूपमा व्यवस्थापन गर्न सक्छन् भन्ने सकारात्मक संकेत दिन्छ ।’

विमानस्थलमा सीको स्वागतबारे टिप्पणी गर्दै गोङले थपे, ‘राष्ट्रपति सीप्रति सम्मान देखाउनुका साथै ट्रम्पले यो कदममार्फत अमेरिकी राजनीतिक वृत्तलाई आफ्नो चीन नीति अघिल्ला राष्ट्रपतिहरूभन्दा फरक हुने बलियो संकेत दिएका छन् ।’

अनपेक्षित वार्ता र ‘अझ ठूलो सम्झौता’को प्रस्ताव

चिनियाँ उपप्रधानमन्त्री हे लिफेङ र अमेरिकी अर्थमन्त्री स्कट बेसेन्टबीच वासिङ्टनस्थित विश्व बैंकको मुख्यालयमा भएको अनपेक्षित बैठकपछि यो युद्धविराम विस्तारको घोषणा आएको हो । यसअघि न्युयोर्कमा दुई नेताबीच आठ घण्टा लामो गहन छलफल भएको बताइएको थियो ।

बैठकपछि सञ्चारकर्मीहरूसँग कुरा गर्दै अमेरिकी अर्थमन्त्री स्कट बेसेन्टले भने, ‘हामी केवल बुसान व्यवस्थालाई निरन्तरता दिन वा अझ ठूलो सम्झौताको अध्ययन गर्न तयार छौँ । हामी दुवै कुरामा सहमत छौँ ।’

बेसेन्टका अनुसार दुवै पक्ष नोभेम्बरमा एसिया–प्यासिफिक आर्थिक सहकार्य (एपीईसी) फोरमका क्रममा चीनको शेन्जेनमा पुन: भेट्न सहमत भएका छन् भने डिसेम्बरमा मियामीमा हुने जी–२० बैठकमा सीको सहभागिता रहने सम्भावना छ ।

अन्तर्राष्ट्रिय प्रतिक्रिया र अमेरिकी राजनीतिमा तरंग

हार्भर्ड युनिभर्सिटीको केनेडी स्कुल अफ गभर्नमेन्टका पूर्व डिन ग्राहम एलिसनले सामाजिक सञ्जालमा लेख्दै भनेका छन्, ‘राष्ट्रपति ट्रम्प प्रदर्शनको कलामा माहिर हुनुहुन्छ ।’ उनले यो स्वागतले चिनियाँ नेताप्रति ट्रम्पको अतुलनीय सम्मान दर्शाएको बताए ।

यस्तै, रैनमिन युनिभर्सिटी अफ चाइनाका प्रोफेसर दियाओ दामिङले विमानस्थलमा ट्रम्पको उपस्थिति अमेरिकी कूटनीतिक इतिहासमै अत्यन्तै दुर्लभ भएको उल्लेख गरे ।

दामिङले भने, ‘यो कदमले उहाँ र उहाँको प्रशासनले चिनियाँ नेतृत्व र चिनियाँ जनताप्रति राखेको गहिरो सम्मानलाई उजागर गर्छ । यसले यो शिखर सम्मेलनलाई दिइएको उच्च प्राथमिकतालाई स्पष्ट पार्छ र सम्बन्ध स्थिर बनाउने, संवाद बढाउने तथा सहकार्य विस्तार गर्नेबारे अमेरिकी समाजको व्यापक अपेक्षालाई प्रतिबिम्बित गर्छ ।’