धनुषामा चोरको आतंक,महिनौ नबित्दै फेरि एउटा जेसिबी चोरी

शम्भु पंडित । जनकपुरधाम । बैशाख २६ गते
धनुषा जिल्लाको ढल्केवरबाट एक महिना बितिसक्दा फेरि एउटा जेसिबी चोरी भएको छ । ढल्केवरस्थित आयूष निर्माण सेवाको आफ्नै कार्यालय अगाडि पार्किङ्ग गरिराखेको अवस्थामा शनिबार राति अन्दाजी १ बजे जेसिबी चोरी भएको सञ्चालक महेन्द्र महतोले जानकारी दिएका छन् । ढल्केवरको पश्चिमचोकबाट आयूष निर्माण सेवाको अनटेस्ट जेसिबी चोरी भएको हो ।
चोरीको घटना थाह पाएपछि इलाका प्रहरी कार्यालय ढल्केवरलाई जानकारी गराएको सञ्चालक महतोले बताए । चोरी भएको जेसिबी यही बैशाख ५ गते जनकपुरधामस्थित एक शोरुमबाट खरिद गरी ल्याइएको थियो । यता जेसिबी चोरी भएको जानकारी पाउन साथ जिल्ला प्रहरी कार्यालय धनुषाको सहयोगमा खोजतलासमा भइरहेको इलाका प्रहरी कार्यालय ढल्केवर प्रहरी निरिक्षक प्रदिप सुवेदीले जानकारी गराएका छन् । खोजतलासको क्रममा थुप्रै ठाउँको सिसिटिभि क्यामराको अनुसन्धान गर्दा जेसिबि जनकपुरसम्म पुगेको अनुमान गरिए पनि भेटिएको छैन । यस्तै, ढल्केवरबाट यस अघि यही बैशाख ५ गते ना १ क ५९२४ नम्बरको जेसिबी प्रहरी कार्यालय अगाडि पार्किङ्ग गरिराखेको अवस्थामा चोरी भएको थियो ।