रौतहट, ०६ असार। प्रतिनिधिसभाकी उपसभामुख रुबी कुमारी ठाकुरले दहेजमुक्त समाज निर्माणको अभियानलाई समर्थन जनाउँदै रौतहटमा स्थानीय रामपुकार पासवानकाे छाेरी सृजना पासवानकाे विवाह समारोहमा सहभागी हुन् उपसभामुख ठाकुर राैतहट आएकी हुन् ।
आयोजित एक दहेजमुक्त विवाह समारोहमा सहभागिता जनाएकी छन् । शुक्रबार फतुवा विजयपुर नगरपालिका–४ टेंग्राहामा आयोजित विवाह समारोहमा सहभागी हुन पुगेकी ठाकुरलाई स्थानीय राजनीतिक नेतृत्व, समाजसेवी तथा सर्वसाधारणले स्वागत गरेका थिए ।
कार्यक्रममा फतुवा विजयपुरका नगरप्रमुख प्रत्याशी विजय यादव निर्विजलगायतका स्थानीय अगुवाहरूको उपस्थिति रहेको थियो । दहेजविरुद्ध निरन्तर आवाज उठाउँदै आएकी उपसभामुख ठाकुरले दहेजमुक्त विवाह सामाजिक परिवर्तनको महत्वपूर्ण आधार बन्न सक्ने बताउँदै यस्ता अभियानलाई प्रोत्साहन गर्नुपर्ने धारणा व्यक्त गरेकी छन् ।
उनले समाजमा विद्यमान कुरीति अन्त्यका लागि युवापुस्ता र अभिभावक दुवैको सोचमा परिवर्तन आवश्यक रहेको उल्लेख गरिन् । मधेश प्रदेशमा दहेज प्रथा अझै पनि चुनौतीका रूपमा रहेको छ ।
कानुनी रूपमा निषेध गरिए पनि विवाहका अवसरमा हुने आर्थिक लेनदेन र सामाजिक दबाबका कारण यो प्रथा पूर्ण रूपमा अन्त्य हुन सकेको छैन्। यसले विशेषगरी विपन्न परिवारलाई थप मारमा पार्ने गरेको सरोकारवालाहरू बताउँछन् ।
यही सन्दर्भमा उच्च राजनीतिक नेतृत्वको दहेजमुक्त विवाहमा सहभागितालाई सामाजिक सन्देशका रूपमा हेरिएको छ । स्थानीयवासीका अनुसार उपसभामुख ठाकुरको उपस्थितिले दहेजविरुद्धको अभियानलाई थप ऊर्जा दिएको छ भने युवापुस्तालाई सकारात्मक प्रेरणा समेत मिलेको छ ।
आयोजक पक्षले विवाहलाई दहेजरहित र सामाजिक उत्तरदायित्वको उदाहरणका रूपमा सम्पन्न गरिएको जनाएको छ । उनीहरूका अनुसार समाज परिवर्तनको सुरुवात व्यक्तिगत व्यवहारबाट हुने भएकाले दहेज नलिने र नदिने संस्कारलाई विस्तार गर्न आवश्यक छ । रौतहटमा सम्पन्न यस कार्यक्रमले मधेशमा दहेजमुक्त समाज निर्माणको बहसलाई पुनः एकपटक केन्द्रमा ल्याएको छ ।
सामाजिक अभियन्ताहरूले यस्ता उदाहरणले समाजमा सकारात्मक सन्देश फैलाउने र कुरीतिविरुद्ध जनमत निर्माण गर्न सहयोग पुग्ने विश्वास व्यक्त गरेका छन् ।
