१३औँ नगरसभामा देवाही गोनाहीको ४४ करोड बढीको बजेट सार्वजनिक

रौतहट, ०९ असार। रौतहटको देवाही गोनाही नगरपालिकाको १३औँ नगरसभा तथा आर्थिक वर्ष २०८३/८४ को नीति, कार्यक्रम र बजेट सभा सोमबार सम्पन्न भएको छ।

“समृद्ध देवाही गोनाही, सुशासन र दिगो विकास हाम्रो प्रतिबद्धता” भन्ने मूल नाराका साथ नगर कार्यपालिकाको कार्यालय प्रेमपुर गोनाहीमा आयोजित नगरसभामा आगामी आर्थिक वर्षका लागि ४४ करोड ६८ लाख ६५ हजार रुपैयाँ बराबरको बजेट प्रस्तुत गरिएको हो।

नगर प्रमुख प्रेमलाल साहको अध्यक्षतामा सम्पन्न नगरसभामा उपप्रमुख परनिया देवी पटेलको तर्फबाट वडा नं. ४ का वडा अध्यक्ष रामप्रवेश प्रसाद पटेलले नीति, कार्यक्रम तथा बजेट प्रस्तुत गर्नुभएको थियो। प्रस्तुत बजेटले नगरपालिकाको समग्र विकास, सुशासन प्रवर्द्धन तथा नागरिकको जीवनस्तर उकास्ने लक्ष्य लिएको जनाइएको छ।

नगरपालिकाले आगामी आर्थिक वर्षका लागि शिक्षा, स्वास्थ्य, कृषि, खानेपानी, सरसफाइ, पूर्वाधार विकास, महिला तथा बालबालिका सशक्तीकरण, युवा स्वरोजगार, सामाजिक सुरक्षा तथा विपद् व्यवस्थापनका कार्यक्रमलाई प्राथमिकतामा राखेको नगरपालिकाका लेखा शाखा प्रमुख प्रदिप कुमार यादवले जनाएको छ।

विशेषगरी कृषिलाई नगरको अर्थतन्त्रको मुख्य आधारका रूपमा विकास गर्दै उत्पादन वृद्धि, आधुनिक कृषि प्रविधिको प्रयोग तथा किसानलाई प्रोत्साहन गर्ने योजनाहरू बजेटमा समेटिएकाे वहाँले बताए ।

त्यसैगरी गुणस्तरीय शिक्षाको पहुँच विस्तार, विद्यालयहरूको भौतिक पूर्वाधार सुधार, स्वास्थ्य संस्थाहरूको सेवा सुदृढीकरण तथा आधारभूत स्वास्थ्य सेवाको पहुँच सुनिश्चित गर्ने कार्यक्रमहरू पनि बजेटमा समावेश गरिएको प्रमुख प्रशासकीय अधिकृत पवन कुमार केसरीले जानकारी दिनु भयो ।

नगर क्षेत्रमा सडक, नाला, कल्भर्ट तथा अन्य भौतिक संरचनाको निर्माण र स्तरोन्नतिलाई समेत प्राथमिकतामा राखिएको छ। प्रस्तुत बजेटमा बेरोजगार युवाहरूका लागि सीपमूलक तालिम, उद्यमशीलता विकास तथा स्वरोजगार प्रवर्द्धनका कार्यक्रम सञ्चालन गरिने वहाँले भन्नू भयो ।

साथै महिला, दलित, जनजाति, पिछडिएका वर्ग तथा विपन्न समुदायको सामाजिक तथा आर्थिक सशक्तीकरणका लागि विभिन्न लक्षित कार्यक्रम सञ्चालन गरिने केसरीले भने ।

नगरसभालाई सम्बोधन गर्दै नगर प्रमुख प्रेमलाल साहले नगरवासीको आवश्यकता र अपेक्षालाई केन्द्रमा राखेर नीति तथा कार्यक्रम तयार गरिएको बताउनुभयो।

उहाँले सीमित स्रोत–साधनका बाबजुद नगरको समग्र विकास, सुशासन कायम गर्ने तथा जनतालाई प्रभावकारी सेवा प्रवाह गर्ने प्रतिबद्धता व्यक्त गर्नुभयो। विकास निर्माणका कामलाई पारदर्शी, उत्तरदायी र परिणाममुखी बनाइने नगर प्रमुख साहकाे भनाइ थियो।

सभामा सहभागी बिभिन्न वडाका निर्वाचित जनप्रतिनिधिहरूले प्रस्तुत नीति तथा कार्यक्रमले नगरको समग्र विकासमा टेवा पुग्ने विश्वास व्यक्त गरेका थिए। विभिन्न वडाका वडा अध्यक्षहरूले आ–आफ्नो वडाका आवश्यकता र प्राथमिकताबारे सुझाव प्रस्तुत गर्दै विकास योजनाको प्रभावकारी कार्यान्वयनमा जोड दिएका थिए।

नगरसभामा वडा नं. १ का वडा अध्यक्ष सफिना खातुन,२ का अतिकु रहमान, ३ का संजय पटेल, ४ का रामप्रवेश प्रसाद पटेल, ५ उपेन्द्र साह कानु,६ का विष्णु दास,७ उपेन्द्र राय यादव,८ का बिजय पटेल र ९ का वीर बहादुर साह,कार्यपालिका सदस्य, वडा सदस्य, विभिन्न राजनीतिक दलका प्रतिनिधि, बुद्धिजीवी, समाजसेवी, शिक्षक, कर्मचारी, ईलाका प्रहरी कार्यालय देवाही गाेनाहीका प्रहरी निरीक्षक तेजप्रसाद भट्टराई , सशस्त्र प्रहरी बल देवाहीका प्रहरी निरिक्षक तथा सञ्चारकर्मीहरूको उल्लेखनीय सहभागिता रहेको थियो।

नगरसभाले प्रस्तुत नीति, कार्यक्रम तथा बजेटमाथि छलफल गरी पारित गरेको छ। सभाबाट नगरको दिगो विकास, सुशासन प्रवर्द्धन, सेवा प्रवाहमा सुधार तथा नागरिकको जीवनस्तर उकास्ने लक्ष्यसहित आगामी आर्थिक वर्षका कार्यक्रमहरू प्रभावकारी रूपमा कार्यान्वयन गर्ने प्रतिबद्धता व्यक्त गरिएको छ।