गोली चलाएर नियन्त्रणमा लिइएका आयनमाथि २७ डाँकाचोरी मुद्दा

आयनको समूहका अरु दुई जनालाई पनि प्रहरीले पक्राउ गरेको छ । पक्राउ पर्नेमा मकवानपुरको बकैया गाउँपालिका घर भएर भक्तपुरको थिमी नगरपालिका–४ बस्ने राकेश थिङ र मनोज कुमार मोक्तान छन् ।

प्रहरीका अनुसार मोटरसाइकलमा चढेर उनीहरूले पैदल हिँडिरहेकाहरूको सुनको सिक्री लुटपाट गर्ने र विभिन्न ठाउँमा डाँकाचोरी गरेको भेटिएको छ । सो समूहले अहिलेसम्म १५ वाट मोटरसाइकल चोरेको भेटिएको एसएसपी घिमिरेले बताए । सिक्री लुट्न हिँड्दा मनोज कुमार मोक्तानले मोटरसाइकल चलाउने र राकेश पछाडि बस्ने गरेका थिए । उनीहरूलाई आयनले कमाण्ड गर्ने गरेको प्रहरीको अनुसन्धानले देखाएको छ ।

करिब ९ महिनाअघि पक्राउ गरिएको सिक्री डलर लुट्ने समूहसँग पनि आयन समूहको ‘नेक्सस’ देखिएको प्रहरीको भनाइ छ । त्यसबेला प्रहरीले पैदल हिँडेकाहरूलाई बाटो सोधेर सिक्री लुट्ने ‘अपराध प्रवृत्ति’ भएकाहरूलाई पक्राउ गरेको थियो ।

आयन समूहले बौद्ध र स्वयभु क्षेत्रमा लुट आतङ्क मच्चाएका थिए । आयन २०७७ मा डाँकाचोरी मुद्दामा पक्राउ परेर जेल बसेर छुटेका हुन् । उनीविरुद्ध २०७९ मा भक्तपुरबाट दुई वटा मुद्दा र इलाका प्रहरी कार्यालय बनेपा लगायतका प्रहरी युनिटमा २७ वटा कसुर दर्ता भएको भेटिएको छ ।

जेनजी आन्दोलन हुँदा लुटिएको हतियार खरिद गरेर आयन समूहले ठुलो डकैती गर्ने योजना बनाएको एसएसपी घिमिरेले बताए । उनले भने, ‘यो समूह पक्राउ परेपछि सो योजना विफल भएको छ ।’

असोज १४ मा बौद्ध गेटमा एक जनाबाट २ लाख रुपैयाँ लुटेपछि जिल्ला प्रहरी परिसर काठमाडौँको सादा पोशाकको टोलीले लुटेराहरूको प्रोफाइलिङ गरेर अनुसन्धान थालेको थियो । पछिल्लो समय उनीहरूले बीवाइडी गाडीमा बसिरहेका एक जनाको सिक्री लुटेर भागेको भेटिएको छ ।