८३ किलो गाँजासहित एक जना प्रहरीको फन्दामा

सिरहा,२३ कात्तिक।  सिरहाको भगवानपुर गाउँपालिकाबाट ८३ किलोभन्दा बढी गाँजासहित एक जना पक्राउ परेका छन् । पक्राउ पर्नेमा भगवानपुर गाउँपालिका–४ कल्याणपुर टोलका ५५ वर्षीय देवशरण यादव रहेका छन् ।

जिल्ला प्रहरी कार्यालय सिरहाका अनुसार आज बिहान करिब ३ः३० बजे भगवानपुर गाउँपालिका–४ स्थित बलान खोलामा केही व्यक्ति टाउकोमा पोका बोकेर आउँदै गरेको सूचना प्राप्त भएको थियो ।

सोही सूचनाका आधारमा इलाका प्रहरी कार्यालय लहान र प्रहरी चौकी ठाडीबाट खटिएको संयुक्त प्रहरी टोली घटनास्थल पुगेको थियो । प्रहरी टोली पुगेपछि उनीहरूले बोकेको पोका फालेर भाग्ने प्रयास गरेका थिए । सोही क्रममा प्रहरीले यादवलाई नियन्त्रणमा लिएको थियो ।