मन्त्रिपरिषद् बैठकमा डीडीसीका प्याकेट, प्रधानमन्त्रीसहित मन्त्रीलाई वितरण

काठमाडौं, २६ जेठ। मंगलबारको मन्त्रिपरिषद् बैठकमा एउटा भिन्न दृश्य देखियो– जहाँ देशका महत्त्वपूर्ण नीतिगत निर्णयसँगै सरकारी स्वामित्वको दुग्ध विकास संस्थान (डीडीसी) का उत्पादनले पनि प्रवेश पाए ।

स्वदेशी उत्पादन प्रवर्द्धन र किसान हित प्राथमिकता दिने उद्देश्यले कृषि, वन तथा पर्यावरणमन्त्री गिता चौधरीले प्रधानमन्त्री बालेन्द्र शाहसहित सबै मन्त्रीलाई डीडीसीका उत्पादनको प्याकेट वितरण गरेकी हुन् ।

प्रधानमन्त्री र मन्त्रीहरूलाई बाँडिएको प्याकेटमा डीडीसीबाट उत्पादित दूध, केशर दूध, बटर, चिज, दही र पेँडा छ ।

स्वदेशी वस्तुको उपभोग बढाउने र सरकारी संस्थानको बजार विस्तार गर्ने एजेन्डा सांकेतिक रूपमा अगाडि बढाउन मन्त्री चौधरीले बैठककै क्रममा डीडीसीको प्याकेट वितरण गरेकी थिइन् ।

मन्त्रिपरिषद् बैठकमा डीडीसीका उत्पादनको देशव्यापी प्रवर्द्धन तथा व्यावसायिक सुदृढीकरणका विषयमा छलफल समेत भएको छ ।

बैठकमा मन्त्री चौधरीले नेपाली किसानबाट संकलित दूधको उचित व्यवस्थापन र बजार सुनिश्चित गर्न सरकारी तहबाटै अग्रसरता लिनुपर्नेमा जोड दिइन् ।

‘डीडीसीलाई थप प्रतिस्पर्धी र आत्मनिर्भर संस्थाका रूपमा विकास गर्न सरकारका विभिन्न निकायबीच समन्वय आवश्यक छ,’ उनले भनिन्, ‘स्वदेशी दुग्ध उत्पादनको संरक्षण र किसानको हितका लागि हामी आफैंले यसको उपभोग र प्रवर्द्धनमा उदाहरण पेस गर्नुपर्छ ।’

प्रधानमन्त्री शाहले पनि डीडीसीका उत्पादनको प्रवर्द्धनमा सरकार प्रतिबद्ध रहेको सन्देश दिएका छन् ।

केही समयअघि उनले आफैं डीडीसीका उत्पादन प्रचार गर्दै स्वदेशी वस्तुको प्रयोग बढाउन आम नागरिकलाई समेत आह्वान गरेका थिए ।

लामो समयदेखि नेपाली उपभोक्तामाझ शुद्ध र गुणस्तरीय दूध, घिउ, दही, पनिर र चिज जस्ता उत्पादन उपलब्ध गराउँदै आएको डीडीसीको यो अभियानले मन्त्रिपरिषद्को साथ पाएपछि थप ऊर्जा मिल्ने विश्वास लिइएको छ ।

सरकारले स्वदेशी उत्पादनलाई राष्ट्रिय गौरवका रूपमा अगाडि बढाउने रणनीति अन्तर्गत यो कदम चालेको हो ।