फागुन २१ निर्वाचनबारे प्रधानमन्त्री कार्की र प्रमुख दलका शीर्ष नेताबीच छलफल

काठमाडौं,१२ पुस। अन्तरिम प्रधानमन्त्री सुशीला कार्कीले आगामी फागुन २१ गते तोकिएको प्रतिनिधिसभा निर्वाचनलाई निर्विवाद र शान्तिपूर्ण बनाउन राजनीतिक सक्रियता बढाएकी छन् । निर्वाचनको अनुकूल वातावरण सिर्जना गर्ने मुख्य लक्ष्यका साथ प्रधानमन्त्री कार्कीले आज अपराह्न प्रमुख तीन दलका शीर्ष नेताहरूसँग सामूहिक वार्ता गर्दै छिन् ।

छलफल राष्ट्रपति रामचन्द्र पौडेलको अगुवाइमा यसअघि शीतल निवासमा भएको सर्वदलीय बैठकको निरन्तरता हो । प्रधानमन्त्रीको सचिवालय स्रोतका अनुसार, अपराह्न ४ बजे बालुवाटारमा हुने भेटमा नेपाली काँग्रेस सभापति शेरबहादुर देउवा, नेकपा (एमाले) का अध्यक्ष केपी शर्मा ओली र नेकपा (नेकपा) का संयोजक पुष्पकमल दाहाल ‘प्रचण्ड’ उपस्थित हुनेछन् ।

बैठकको आधार तयार पार्न सरकारका प्रवक्ता तथा सञ्चार मन्त्री जगदीश खरेलले शुक्रवार नै तीनै नेताको निवासमा पुगेर व्यक्तिगत रूपमा निमन्त्रणा दिएका थिए । मन्त्री खरेलले दलहरूबिच निर्वाचनका लागि साझा समझदारी कायम गर्न र विश्वासको वातावरण बनाउन विशेष आग्रह गरेको बताइएको छ ।

केही महिनाअघि भएको ‘जेन-जी आन्दोलन’ का क्रममा राजनीतिक दलका कार्यालयहरूमा भएको व्यापक तोडफोड र त्यसले निम्त्याएको सुरक्षा चुनौतीलाई सम्बोधन गर्न सरकारले उच्च प्राथमिकता दिएको छ । विशेष गरी एमाले लगायतका दलहरूले शान्ति सुरक्षाको स्थिति सुधार नभएसम्म निर्वाचनमा शङ्का व्यक्त गरिरहेका बेला प्रधानमन्त्री कार्कीले दलहरूलाई विश्वस्त तुल्याउने प्रयासलाई तीव्र पारेको देखिन्छ ।

यसै सन्दर्भमा सञ्चार मन्त्री खरेल र कानुन मन्त्री अनिलकुमार सिन्हाले पुस ८ र ९ गते काँग्रेस, एमाले, माओवादी, राष्ट्रिय स्वतन्त्र पार्टी, राष्ट्रिय प्रजातन्त्र पार्टी र जनमत पार्टी लगायतका केन्द्रीय कार्यालयहरूमा पुगेर क्षतिको प्रत्यक्ष अवलोकन गरेका थिए । त्यही अनुगमन र नेताहरूसँगको अनौपचारिक कुराकानीको जगमा सरकारले अब शीर्ष स्तरीय औपचारिक संवादलाई अघि बढाएको हो ।

निर्वाचन आयोगले पनि फागुन २१ को मतदानलाई लक्ष्य गरी कार्यतालिका सार्वजनिक गरिसकेको अवस्थामा यो छलफलले राजनीतिक तनाव न्यूनीकरण गरी स्वतन्त्र र निष्पक्ष निर्वाचनको मार्ग प्रशस्त गर्ने अपेक्षा गरिएको छ ।