बालेन सरकारमा महँगी र भ्रष्टाचार झन् बढ्यो : उपेन्द्र यादव

रौतहट ,१६ कात्तिक।  जनता समाजवादी पार्टी (नेपाल)का केन्द्रीय अध्यक्ष एवं पूर्व उपप्रधानमन्त्री उपेन्द्र यादवले जनतालाई अनेकौँ आश्वासन बाँडेर सत्तामा पुगेको वर्तमान सरकारले जनतामा निराशा मात्रै बढाएको आरोप लगाएका छन् ।

चुनावका बेला सुशासन, भ्रष्टाचार नियन्त्रण र जनताको जीवनस्तर सुधार गर्ने प्रतिबद्धता जनाएको राष्ट्रिय स्वतन्त्र पार्टी (रास्वपा) नेतृत्वको सरकार अहिले ती सबै क्षेत्रमा असफल भइरहेको यादवको दाबी छ ।

अग्रगामी मोर्चाको लुम्बिनी प्रदेश समन्वय समितिले आइतबार बाँकेको नेपालगञ्जमा आयोजना गरेको प्रदेशस्तरीय कार्यकर्ता भेला तथा अभिमुखीकरण कार्यक्रमलाई सम्बोधन गर्दै यादवले सरकारका कामकारबाहीप्रति तीव्र असन्तुष्टि व्यक्त गरेका हुन् ।

उनले वर्तमान सरकारको पालामा भ्रष्टाचार र कमिसनतन्त्र नियन्त्रण हुनुको सट्टा झन् बढ्दै गएको तथा महँगी दोब्बर भएको आरोप लगाए । दिनभर काम गरेर परिवारको छाक टार्ने गरिब तथा विपन्न नागरिक अहिले थप आर्थिक सङ्कटमा परेको उनको भनाइ थियो ।

‘भ्रष्टाचार र कमिसनतन्त्र नियन्त्रणमा छैन, बरु बढ्दै गएको छ । महँगी दुई गुणा बढेको छ । गरिब जनता, जसले दिनभर काम गरेर भोजन जुटाउँछन्, उनीहरू सङ्कटमा परेका छन्,’ यादवले भने, ‘शिक्षाको गुणस्तर कमजोर हुँदै गएको छ, सरकारी विद्यालयमा पढाइ भइरहेको छैन, सरकारी अस्पतालमा उपचार पाइँदैन र स्वास्थ्य बिमा योजना असफल भइरहेको छ ।

गरिबका लागि यो सरकार साथमा छैन, सुशासनको त नामोनिसान नै छैन ।’

पूर्वउपप्रधानमन्त्री यादवले वर्तमान सरकार विदेशी ऋणबाट सञ्चालन भइरहेको आरोपसमेत लगाए । विगतमा कांग्रेस र कम्युनिस्ट नेतृत्वका सरकारबाट आजित भएका जनताले अहिले पनि अपेक्षित परिवर्तनको अनुभूति गर्न नसकेको उनको दाबी थियो ।

यादवले सङ्घीयता, लोकतन्त्र र संविधानको रक्षा गर्न अग्रगामी मोर्चा गठन गरिएको उल्लेख गर्दै मुलुकमा देखिएका राजनीतिक तथा संवैधानिक सङ्कटविरुद्ध जनतालाई सचेत गराउन आफूहरू देशव्यापी अभियानमा निस्किएको बताए ।

कार्यक्रममा जनमत पार्टीका अध्यक्ष सिके राउतले जनताका अधिकार र चाहना पूरा गराउन अब आन्दोलन अपरिहार्य भएको बताए । त्यस्तै, प्रगतिशील लोकतान्त्रिक पार्टीका संरक्षक जनार्दन शर्मा र आम जनता पार्टीका अध्यक्ष प्रभु शाहले देशलाई सही दिशामा ल्याउन राष्ट्रव्यापी जागरण अभियान सुरु गरिएको उल्लेख गरे ।

अग्रगामी मोर्चाले लुम्बिनी प्रदेशअन्तर्गत रुपन्देही र बाँकेमा कार्यकर्ता भेला तथा प्रशिक्षण कार्यक्रम सञ्चालन गरेको जनाएको छ । बाँकेका अध्यक्ष कौशल धोबीको अध्यक्षतामा सम्पन्न कार्यक्रममा लुम्बिनी प्रदेशका सयौँ नेता तथा कार्यकर्ताको सहभागिता रहेको थियो ।