नारायणी अस्पतालमा बिरामीको मृत्युपछि छानबिन समिति गठन, पाँच स्वास्थ्यकर्मी हटाइए

गठित समितिमा नारायणी अस्पतालका डा. निरज कुमार सिंह, जिल्ला प्रशासन कार्यालय पर्साका प्रशासकीय अधिकृत विनय कुमार राम, जिल्ला प्रहरी कार्यालय पर्साका प्रहरी निरीक्षक, वीरगञ्ज महानगरपालिका–२५ का वडा अध्यक्ष आशुतोष चतुर्वेदी, मृतक पक्षका प्रतिनिधि विकास पटेल तथा अस्पताल प्रशासनका प्रतिनिधि सुनिल कुमार रोनियार सदस्य रहेका छन्।

जिल्ला प्रहरी कार्यालय पर्साका प्रवक्ता एवं सूचना अधिकारी डीएसपी चक्रबहादुर मल्लका अनुसार समितिलाई साउन ९ गते भएको घटनाको सत्यतथ्य अध्ययन तथा विश्लेषण गरी सात दिनभित्र प्रतिवेदन बुझाउने जिम्मेवारी दिइएको छ। समितिको प्रतिवेदनका आधारमा दोषी देखिने व्यक्तिमाथि आवश्यक कानुनी तथा प्रशासनिक कारबाही अघि बढाइने उनले बताए।

घटना हुँदा आकस्मिक कक्षमा कार्यरत डा. प्रमोद राम, डा. राम किशोर सिंह, प्रहलाद प्रसाद, नरेश कुमार चौधरी र आस्था यादवलाई छानबिन सम्पन्न नहुँदासम्मका लागि नियमित जिम्मेवारीबाट हटाइएको अस्पताल प्रशासनले जनाएको छ।

मृतकका आफन्तले अक्सिजनमा रहेका बिरामीलाई स्थानान्तरण गर्ने क्रममा अक्सिजन हटाइएकाले गम्भीर लापरबाहीका कारण राजकुमार पटेलको मृत्यु भएको आरोप लगाएका छन्। यद्यपि, उक्त आरोपबारे छानबिन समितिले तथ्यगत अध्ययन गर्ने जनाएको छ।

उपचारमा लापरबाही भएको भन्दै आक्रोशित प्रदर्शनकारी आकस्मिक कक्षमा प्रवेश गरी होहल्ला तथा तोडफोडमा उत्रिएपछि स्थिति नियन्त्रणमा लिन प्रहरीले लाठीचार्जसमेत गरेको थियो।

प्रशासनसँग भएको सहमतिपछि मृतक पक्षले शव बुझेर पोस्टमार्टम गराई धार्मिक परम्पराअनुसार अन्त्येष्टि गर्न सहमति जनाएको छ। अस्पताल प्रशासनले घटनाको निष्पक्ष छानबिन हुने विश्वास दिलाउँदै नारायणी अस्पतालबाट प्रवाह हुने नियमित स्वास्थ्य सेवालाई थप प्रभावकारी र अवरोधरहित रूपमा सञ्चालन गरिने जनाएको छ।