पक्राउ परेका सीडीओ रिजालविरुद्धका मुख्य आरोप सार्वजनिक

काठमाडौं, १७ चैत। जेनजी आन्दोलन भूमिका खेलेको आरोपमा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखक पक्राउ परेपछि तेस्रो नम्बरमा काठमाडौँका तत्कालीन प्रमुख जिल्ला अधिकारी (सीडीओ) छवि रिजाल पक्राउ परेका छन्।

उनलाई प्रहरीले मंगलबार बिहान काठमाडौँको सुविधानगरबाट पक्राउ गरेको हो । भदौ २३ र २४ गते बानेश्वर क्षेत्रमा भएको जेनजी प्रदर्शनका क्रममा घातक बल प्रयोग हुँदा भएको मानवीय क्षतिको जिम्मेवार ठहर गर्दै जाँचबुझ आयोगको सिफारिस अनुसार उनलाई पक्राउ गरिएको हो।

गौरीबहादुर कार्की नेतृत्वको उच्चस्तरीय जाँचबुझ आयोगले सो घटनामा तत्कालीन प्रजिअ रिजाललाई दोषी किटान गर्दै फौजदारी मुद्दा चलाउन सिफारिस गरेको थियो।

मन्त्रिपरिषद्ले आयोगको प्रतिवेदन कार्यान्वयन गर्ने निर्णय गरेसँगै आन्दोलन दबाउन मुख्य भूमिका खेलेको आरोपमा तत्कालीन प्रधानमन्त्री ओली र गृहमन्त्री लेखक यसअघि नै पक्राउ परेर अदालतबाट ५ दिन म्याद थप भइसकेको छ।  यस्तै रिजालले बानेश्वरमा किशोरहरूको ज्यान जानेगरी गोली चलाउन आदेश दिएको भन्दै तीव्र आलोचना हुँदै आएको थियो।