पत्रकारविरुद्धको अभिव्यक्तिमा गृहमन्त्री गुरुङले माफी माग्नुपर्ने अधिकारकर्मीको माग

काठमाडौं, २५ भदौ। गृहमन्त्री सुधन गुरुङले पत्रकारहरूविरुद्ध धम्कीपूर्ण अभिव्यक्ति दिएको भन्दै मानव अधिकारकर्मी, वरिष्ठ कानुन व्यवसायी तथा नागरिक अभियन्ताहरूले कडा आपत्ति जनाएका छन्। उनीहरूले गृहमन्त्री गुरुङलाई आफ्ना आपत्तिजनक शब्द फिर्ता लिँदै सार्वजनिक रूपमा माफी माग्न माग गरेका छन्।

राष्ट्रिय मानव अधिकार आयोगका पूर्वआयुक्त सुशील प्याकुरेल, वरिष्ठ अधिवक्ता दिनेश त्रिपाठी, मानव अधिकारकर्मी सुबोध प्याकुरेल, शोभाकर बुढाथोकी, सोम निरौला, महिला अधिकारकर्मी श्यामकुमारी साह र युवा अभियन्ता अभिषेक अधिकारीले संयुक्त वक्तव्य जारी गर्दै गृहमन्त्रीको अभिव्यक्तिको विरोध गरेका हुन्।

गृहमन्त्री गुरुङले गत २३ भदौमा दिएको अभिव्यक्ति समग्रमा आपत्तिजनक रहेको र त्यसमा पत्रकारविरुद्ध प्रयोग गरिएका धम्कीपूर्ण शब्दप्रति आफूहरूको गम्भीर आपत्ति रहेको उनीहरूले उल्लेख गरेका छन्।

मुलुकमा शान्ति सुरक्षा तथा अमनचयन कायम गर्ने र विपद् व्यवस्थापनको मुख्य अभिभारा बोकेका गृहमन्त्रीको अराजक शैली र अभिव्यक्तिले शासनप्रणालीकै गरिमा घटाएको विज्ञप्तिमा उल्लेख छ।

‘गृहमन्त्री चयन तथा उनीमाथि लागेका आरोपमा गरिएको ‘अनुसन्धान’ हामीले शंकाको घेराभित्रै राखेको सन्दर्भमा आम पत्रकारमाथिको गुरुङको आक्रामक टिप्पणीले उनले आफू जिम्मेवारीमा रहेको पद र ओहोदाको मर्यादा, संयम र गाम्भीर्य नबुझेको हाम्रो अनुभूति छ,’ वक्तव्यमा भनिएको छ।

पत्रकारको प्राथमिक दायित्व नै राज्यसंयन्त्रमा रहेका जिम्मेवार व्यक्तिहरूमाथि प्रश्न उठाउनु र जवाफदेही बनाउनु रहेको स्मरण गराउँदै अधिकारकर्मीहरूले नेपाली सञ्चारजगत्ले पञ्चायतकालदेखि नै अनेक चुनौती र धम्कीबीच आफ्नो कर्तव्य निर्वाह गर्दै आएको बताएका छन्।

पञ्चायतविरोधी आन्दोलन, सशस्त्र द्वन्द्व, दरबार हत्याकाण्डपछिको अन्योल, ज्ञानेन्द्र शाहको ‘असोजतन्त्र’ विरुद्धको संघर्षदेखि संविधान निर्माणसम्म सञ्चारजगत्ले जिम्मेवार भूमिका निर्वाह गरेको उनीहरूको भनाइ छ।

‘धम्कीबाट पत्रकार हतोत्साही हुँदैनन्’

नेपालका पत्रकारहरूले अधिनायकवादी शैलीका शासकहरूको सामना विगतमा पनि गरिसकेको उल्लेख गर्दै अधिकारकर्मीहरूले डर–त्रास र धम्कीका सामु पत्रकारहरू पछि नहट्ने स्पष्ट पारेका छन्।

‘विगतमा सुन काण्ड, नक्कली भुटानी शरणार्थी काण्ड, सहकारी ठगी काण्ड जस्ता अनगिन्ती प्रकरणमा सत्यतथ्य उजागर गर्ने कार्यमा पछि नहटेका पत्रकारहरू गृहमन्त्रीको धम्कीपूर्ण बोलीबाट हतोत्साही हुने छैनन् भन्नेमा हामी विश्वस्त छौँ,’ विज्ञप्तिमा भनिएको छ।

साथै, आचारसंहिताको दायराभित्र रहेर जिम्मेवारीपूर्वक समाचार सम्प्रेषण गर्न सञ्चारकर्मीहरूलाई आग्रह गर्दै अधिकारकर्मीहरूले गृहमन्त्री गुरुङलाई आफ्ना शब्द अविलम्ब फिर्ता लिई माफी माग्न पुनः ध्यानाकर्षण गराएका छन्।