भेनेजुएलामा शक्तिशाली भूकम्प: ३२ जनाको मृत्यु, ७०० घाइते

भेनेजुएला, ११ असार। दक्षिण अमेरिकी राष्ट्र भेनेजुएलामा ४० सेकेण्डको अन्तरालमा आएका दुई शक्तिशाली भूकम्पका कारण ठूलो मानवीय तथा भौतिक क्षति भएको प्रारम्भिक विवरण सार्वजनिक भएको छ। कार्यवाहक राष्ट्रपति डेल्सी रोड्रिगेजका अनुसार हालसम्म ३२ जनाको मृत्यु भएको छ भने ७०० भन्दा बढी व्यक्ति घाइते भएका छन्।

खोज तथा उद्धार कार्य अझै जारी रहेकाले मृतक तथा घाइतेको संख्या थप बढ्न सक्ने अनुमान गरिएको छ। उद्धारकर्मीहरू राजधानी क्षेत्रका विभिन्न स्थानमा भग्नावशेषभित्र फसेकाहरूको खोजीमा जुटेका छन्। स्थानीय सञ्चारमाध्यमहरूका अनुसार कतिपय स्थानमा भग्नावशेषमुनि फसेका मानिसहरूको सहयोगका लागि पुकार सुनिएको छ।

अमेरिकी भूगर्भ सर्वेक्षण (यूएसजीएस) ले प्रारम्भिक आकलनमा भूकम्पका कारण १० हजारभन्दा बढी मानिसको मृत्यु हुने सम्भावना ४४ प्रतिशत तथा एक लाखभन्दा बढीको मृत्यु हुने सम्भावना ३० प्रतिशत रहेको जनाएको थियो।

स्थानीय समयअनुसार साँझ ६:०४ बजे आएको भूकम्पको तीव्रता क्रमशः ७.२ र ७.५ म्याग्निच्युड मापन गरिएको छ। भूकम्पको केन्द्रबिन्दु राजधानी कराकासको पश्चिमी क्षेत्रमा रहेको बताइएको छ। यसको धक्का छिमेकी देश कोलम्बियाको राजधानी बोगोटासम्म महसुस गरिएको थियो।

भूकम्पपछि राजधानी कराकासका धेरै भवनमा विद्युत् आपूर्ति अवरुद्ध भएको छ भने मेट्रो सेवा पूर्ण रूपमा बन्द गरिएको छ। राष्ट्रिय बिदाको दिन परेकाले धेरै नागरिक घरमै रहेका बेला भूकम्प गएको जनाइएको छ।

यसैबीच अमेरिकी विदेशमन्त्री मार्को रुबियोले अमेरिका तत्काल खोज तथा उद्धार टोली, चिकित्सकीय सामग्री तथा मानवीय सहायता भेनेजुएलातर्फ पठाइरहेको जानकारी दिएका छन्।

सामाजिक सञ्जाल एक्समार्फत उनले भूकम्पमा ज्यान गुमाउनेका परिवार, घाइते तथा उद्धार कार्यमा खटिएका सुरक्षाकर्मीहरूप्रति समवेदना व्यक्त गरेका छन्।

अमेरिकी विदेश मन्त्रालयका अधिकारीहरूका अनुसार अमेरिकी सहायता टोलीहरू भेनेजुएली अधिकारीहरूसँग निरन्तर सम्पर्कमा रही आवश्यक मानवीय सहायता परिचालन गरिरहेका छन्।

भूकम्पबाट प्रभावित क्षेत्रमा उद्धार तथा राहत कार्य तीव्र पारिएको छ भने क्षतिको विस्तृत विवरण आउन अझ केही समय लाग्ने अनुमान गरिएको छ।