ठमेलबाट गैरकानुनी रूपमा बसिरहेका १० बङ्गलादेशी पक्राउ

काठमाडौं, २४ भदौ। काठमाडौँको ठमेल क्षेत्रमा विभिन्न होटेल तथा गेस्टहाउसहरूमा गैरकानुनी रूपमा बसोबास गरी शङ्कास्पद गतिविधिमा संलग्न रहेको आरोपमा प्रहरीले १० जना बङ्गलादेशी नागरिकलाई पक्राउ गरेको छ ।

काठमाडौँ उपत्यका अपराध अनुसन्धान कार्यालय, टेकुका अनुसार ठमेल क्षेत्रमा केही विदेशी नागरिकहरू अवैध रूपमा बसोबास गरिरहेको भन्ने सूचनाका आधारमा प्रहरी टोली परिचालन गरिएको थियो । सोही क्रममा सोमबार काठमाडौँ महानगरपालिका–२६ ठमेलका विभिन्न स्थानमा छापा मारेर उनीहरूलाई नियन्त्रणमा लिइएको कार्यालयले जनाएको छ ।

प्रहरीका अनुसार पक्राउ परेकाहरूलाई होटेल ढाका एक्सप्रेस, होटेल डी भेडा र होटेल अल रहमानलगायतका होटेल/गेस्टहाउसबाट नियन्त्रणमा लिइएको हो ।

पक्राउ पर्नेहरूमा ४६ वर्षीय फहिमा अक्तार हसन, ४८ वर्षीय महामुद, ४५ वर्षीय महाबुब हसन, ४९ वर्षीय रेपोन महमुद, ३० वर्षीय एमडी-केरामोट अलि खान, ३० वर्षीय सहिदुर रहमान, ५० वर्षीय एमडी खलिलुर रहमान, २८ वर्षीय अरिफुर रहमान, ४२ वर्षीय एमडी मारुफ मृधा र ६४ वर्षीय मोहम्मद हनिफ मिया रहेका छन् । उनीहरू हाल ठमेल क्षेत्रमा बस्दै आएको प्रहरीले जनाएको छ ।

नियन्त्रणमा लिइएका सबैलाई थप अनुसन्धान तथा आवश्यक कारबाहीका लागि अध्यागमन विभाग, कालिकास्थान काठमाडौँ पठाइएको कार्यालयले विज्ञप्तिमार्फत जानकारी दिएको छ ।